Klerksdorp Rekord, Klerksdorp - Twee plaaslike oumas wat woeker met hul wolskeppings het ‘n internasionale ontwerpkompetisie gewen.

Die World of Wearable Art is al beskryf as die mees uitspattigste modevertoning in die wêreld. Dit is ‘n wêreldklas ekstravaganza uniek aan Nieu-Seeland en omarm die wêreld van kuns, mode, argitektuur en ontwerp en enige iemand mag deelneem. Dit is waar die 86-jarige Lena van der Wat en 82-jarige Joanne van Wyk se hekelnaalde oortyd gewerk het. Hul handewerk met die hekel van verskillende kleurvolle oumablokkies het gestalte gegee aan ‘n lewendige kunswerk van ‘n uitspattige ruimtewese in die kategorie Mars and Beyond.