STELLALANDER-POTCHEFSTROOM: Brigadier Kiewiet van Zyl (69), ’n voormalige provinsiale hoof van speurders en ’n gerespekteerde inwoner van Potchefstroom, is Donderdagmiddag, 15 Januarie, ná ’n hartaanval oorlede. Hy word onthou as ’n ware pilaar van krag en diens.
Volgens sy vrou, Lauren van Zyl, was hy besig om fiets te ry toe hy die hartaanval opgedoen het. Nooddienste het omstreeks 16:25 ’n oproep ontvang en kort daarna by Strausslaan in Vanderhoffpark opgedaag, maar Van Zyl is ongelukkig reeds op die toneel oorlede. Van Zyl het 42 jaar lank in die Suid-Afrikaanse Polisiediens gedien en gedurende sy loopbaan verskeie sleutel- en senior poste beklee.
Sy toewyding, leierskap en professionele kundigheid het hom wyd gerespekteer gemaak binne polisiegange en die breër gemeenskap. Ná sy aftrede het hy vir die afgelope vier jaar as voorsitter van die Mooirivier-tak van die Ou Polisiemannevereniging gedien. Hy was ook goed bekend onder Potchefstroom-inwoners vir sy betrokkenheid by die Cachet Park City Improvement District (CID), waar hy van 2017 tot Desember 2020 as Hoof Operasionele Bestuurder gedien het en sy uitgebreide kennis en ervaring tot voordeel van die gemeenskap aangewend het. Brigadier Van Zyl sal onthou word vir sy onwrikbare diens, sterk leierskap en lewenslange toewyding aan die gemeenskap. Stellalander betuig hulle meegevoel aan sy familie en geliefdes. Van Zyl sal Vrydag, 23 Januarie om 10:00 uit die Methodist Church in Potchefstroom terruste gelê word.
