STELLALANDER-VRYBURG: Die tweede rugbywedstryd in die Neser B-liga is Saterdag, 13 April tussen Vryburg en Zeerust by Gert Lubbe Sportstadion in Vryburg beslis.
Vryburg RugbyKlub het met 26-22 teen Zeerust Rugbyklub gewen. Heinrich Jankowitz van Vryburg het een drie en drie doelskoppe aangeteken met Joe van Huyssteen, Marco Salmonson en Rudi van Dyk wat elk ‘n drie aangeteken het.
Die grootste hit is toegeken aan Heinrich Jankowitz en die voorspeler van die dag was Hendrik Scholtz. Marco Salmonson is aangewys as die agterspeler van die dag. Vryburg het ook hul wedstryd opgedra aan Kierie Engelbrecht wat tans baie siek is. Zeerust Rugbyklub het hulle wedstryd teen Vryburg ook opgedra aan Chris Swanepoel (oorlede: 2024-04-09) en Francois Venter (oorlede: 2024-03-28). Die volgende wedstryd wat Vryburg gaan speel is komende Saterdag, 20 April teen Leeudoringstad op Vryburg. Almal is welkom om die spanne te ondersteun en uitstekende plaaslike rugby te geniet.
