STELLALANDER-VAALHARTS: AfriForum se Vaalharts-buurtwag het in Junie in samewerking met die Suid-Afrikaanse Polisiediens (SAPD) en ander rolspelers ’n geheime operasie uitgevoer om onwettige mynbedrywighede in die omgewing van die geslote Bellsbank-diamantmyn (naby Spitskopdam in die Noord-Kaap) hok te slaan en ongeveer 25 arrestasies gemaak.
Sowat 45 mense, waaronder lede van die Suid-Afrikaanse Nasionale Weermag (SANW), immigrasie, misdaadintelligensie en die Eenheid vir Gemeenskapsveiligheid in Vaalharts, was by die misdaadoperasie betrokke. Die operasie se sukses kan toegeskryf word aan die samewerking tussen hierdie verskeie entiteite asook die gebruik van tegnologie, soos hommeltuie en ’n toegewyde radionetwerk, wat in die gebied ontplooi is. Talle individue is vir hul vermeende betrokkenheid by onwettige mynbouaktiwiteite gearresteer. ’n Aantal vermeende onwettige immigrante is ook aangekeer. Gedurende die operasie is daar beslag gelê op ’n aansienlike hoeveelheid toerusting wat vir onwettige mynbouaktiwiteite gebruik word waaronder ’n kragopwekker, ’n breker en ’n verskeidenheid van mynsiwwe. Alle verdagtes en gekonfiskeerde items is aan die SAPD in Jan Kempdorp oorhandig. Hierdie betekenisvolle prestasie stuur ’n kragtige boodskap dat gemeenskappe bereid en in staat is om standpunt teen onwettige aktiwiteite in te neem, en hand aan hand met wetstoepassers werk om ’n veiliger omgewing vir alle inwoners te verseker. Die proaktiewe betrokkenheid van plaaslike organisasies en die doeltreffende benutting van gevorderde tegnologie dien as duidelike aanwysers van die potensiaal om misdaad en onwettige aktiwiteite deur samewerkende pogings te bekamp.
