RUSTENBURG HERALD - RUSTENBURG - Die VF Plus het die vonke behoorlik laat spat tydens ‘n raadsvergadering van die Rustenburg-plaaslike munisipaliteit (RLM) in repliek op ‘n mosie van wantroue in die VF Plus-voorsitter van die munisipale finansiële oorsigkomitee (MPAC). Die ANC het in samespanning met die EFF ‘n wantrouemosie in die VF Plus-voorsitter ingestel.
In die mosie is onder meer aangevoer dat hy nie sy mandaat en wetlike verpligtinge uitgevoer het nie en versuim het om die munisipale bestuur vir onreëlmatige uitgawes aanspreeklik te hou.
Onreëlmatige besteding by RLM beloop reeds meer as R6 miljard. Die VF Plus het hierdie bewerings met dokumentêre bewyse in die raad weerlê. Uit die dokumentasie blyk dit duidelik dat die munisipale bestuurder, adv Ashmar Khuduge, die burgemeester, Shiela Mabala-Huma en die speaker, Lebogang Pule, geen samewerking aan die voorsitter en oorsigkomitee gegee het nie. Verskeie versoeke tot inligting en finansiële verslae is geïgnoreer. Dít in direkte stryd met munisipale wetgewing. Die ouditeur-generaal (OG) het ook hierdie onreëlmatige optrede van die munisipale bestuur bevestig.
Konsekwente optrede deur die munisipale raad sou veronderstel dat hierdie persone onmiddellik uit hul poste en ampte verwyder moes word en behoorlik aanspreeklik gehou word vir hul optrede. Dit is ironies dat ‘n mosie van die ANC en EFF die omvang van hul eie wanbestuur en wetteloosheid nou aan die lig bring.
Die verwydering van die VF Plus-voorsitter was ‘n deursigtige poging om onreëlmatighede in die RLM te verdoesel, maar dit het nou skouspelagtig misluk.
In ‘n verdere verwikkeling het die VF Plus ‘n mosie gebring om die hemelhoë spysenieringskostes in die raad te besnoei. Die VF Plus het voorgestel dat daar voortaan slegs vrugte-versnaperings by raadsvergaderings beskikbaar gestel word instede van die oordadige maaltye wat tans bedien word.
Só ‘n reëling sal ook plaaslike boere en verskaffers bevoordeel. Veral ANC- en EFF-raadslede het dié mosie luidkeels verwerp.
Al hierdie gebeure ontbloot weer die algemene wetteloosheid en hebsug in ANC-beheerde munisipaliteite met sy EFF-kohorte wat dit aanvuur.
Die VF Plus sal voortgaan om sulke onreëlmatighede te ontbloot en te stry teen die ANC se wetteloosheid wat ‘n eens trotse munisipaliteit stelselmatig vernietig.
