STELLALANDER-VRYBURG: Suid-Afrika het Maandag, 13 Januarie hul 15-tal span vir die ICC Kampioentrofee 2025 aangekondig, met Temba Bavuma wat as kaptein aangewys is.
Die span, gekies deur witbal-afrigter Rob Walter, bevat 10 spelers wat aan die 2023 ICC Mans Krieket Wêreldbeker in Indië deelgeneem het, waar Suid-Afrika die halfeindronde gehaal het.
Die span word versterk deur die terugkeer van vinnige bouler-sterre Anrich Nortje en Lungi Ngidi. Die toernooi sal Nortje se terugkeer tot eendagkrieket wees, sy eerste verskyning in die 50-boulbeurt-formaat sedert September 2023. Hy was aan die kantlyn weens ‘n stresfraktuur in sy rug, wat veroorsaak het dat hy die 2023 Wêreldbeker moes misloop. Lungi Ngidi maak ook sy terugkeer nadat hy sedert Oktober 2024 weens ‘n liesbesering uit internasionale krieket was. Die span sluit ook nuwe gesigte in soos Tony de Zorzi, Ryan Rickelton, Tristan Stubbs en Wiaan Mulder, wat almal hul debuut by ‘n 50-boulbeurt ICC-toernooi sal maak. Suid-Afrika se span vir die ICC Kampioentrofee 2025 is Temba Bavuma (k), Tony de Zorzi, Marco Jansen, Heinrich Klaasen, Keshav Maharaj, Aiden Markram, David Miller, Wiaan Mulder, Lungi Ngidi, Anrich Nortje, Kagiso Rabada, Ryan Rickelton, Tabraiz Shamsi, Tristan Stubbs en Rassie van der Dussen. Volgens afrigter Rob Walter beskik die span oor ‘n oorvloed ervaring: “Hierdie span het spelers wat gereeld in hoëdruk-situasies presteer het. Daardie soort ervaring is onskatbaar in ‘n toernooi soos hierdie. “Ons het daarin geslaag om die kern van ons 2023 Wêreldbeker-span te behou terwyl ons vars talent bygevoeg het. Ons onlangse prestasies by ICC-toernooie wys dat ons in staat is om die later stadiums van globale toernooie te haal. Nou wil ons verder gaan en die gesogte trofee huis toe bring,” het Walter bygevoeg. Die Proteas het die Kampioentrofee net een keer gewen – die eerste toernooi in 1998, toe hulle die Wes-Indiese Eilande met vier paaltjies in die eindstryd geklop het. Die Kampioentrofee 2025 word van 19 Februarie to 9 Maart gespeel.
