BRITS POS – BRITS – Dubai Academy, ‘n internasionale krieket-toerspan het in Desember verskeie wedstryde in Suid-Afrika kom speel, en op 13 Desember, Brits Krieketklub gekies om hul wedstryde teen Hoërskool Zwartkop te speel.
Volgens die bestuur van Brits Krieketklub, was dit vir hulle ‘n besonderse voorreg om as gasheer vir dié wedstryde op te kon tree.
“Ons fasiliteite is van hoogstaande gehalte en na afloop van die suksesvolle wedstryde, kan ons met trots daarna uitsien om meer sulke toernooie aan te bied,” sê Wynand de Bruyn, woordvoerder van die klub.
*Hoërskool Zwartkop (Zwarries) o.15 vs Dubai Juniors:
In die dag se openingskragmeting het die Zwarries o.15-span ‘n kliniese vertoning gelewer en Dubai Juniors met 83 lopies in ‘n 25-boulbeurt-wedstryd verslaan.
Zwarries se o.15’s het eerste gekolf en ‘n indrukwekkende 154/2 behaal. WJ Esterhuizen het die aanval gelei met ‘n bestendige 57* van 67 balle, ondersteun deur Jan-Deon Cilliers se flinke 41 van 38 aflewerings. Dubai Juniors se boulers het gesukkel om die telling in toom te hou.
In reaksie hierop het Dubai Juniors onder druk gewankel en slegs 71 lopies in 19.2 boulbeurte behaal. Conrad Fourie was die uitblinker-bouler vir Zwarries met ‘n indrukwekkende 4/8, terwyl Franco van Staden met 2/11 presteer het. Dubai se Cullum Andrews was met 16 van 17 balle die besoekers se topkolwer, maar sy pogings was onvoldoende om die Zwarries se totaal uit te daag.
Zwartkop 1ste XI vs Dubai Academy:
In die tweede wedstryd van die dag het Zwartkop se 1ste XI in ‘n wedstryd van 30 boulbeurte met Dubai Academy kragte gemeet. Zwarries het die loot gewen en besluit om eerste te kolf, maar het gesukkel om momentum te bou en kon slegs ‘n beskeie 122 almal uit in 20.4 boulbeurte behaal. Zandre van Staden het die kolfbeurt geanker met ‘n 55 van 53 balle, maar die res van die kolwers kon nie kapitaliseer nie. Dubai se boulers was uitsonderlik en het die Zwartkop-kolforde afgetakel.
Met ’n teiken van 123 het Dubai Academy vroeë senuwees oorkom en die teiken in 22 beurte bereik, met ’n eindtelling van 123/6. Zwartkop se boulers het dapper geveg, met Liam van Wyk (2/25) en Christian Visagie (2/15) wat noemenswaardige boulbeurte gelewer het.
Die Dubai Academy-toer was ‘n vertoonvenster van jeugdige talent en geesdriftige kompetisie.
