RUSTENBURG HERALD - RUSTENBURG - Vier jaar nadat ‘n jong Rustenburger tydens ‘n geselligheid in ‘n sportlokaal van ‘n bekende skool doodgeslaan is, is die man wat daaraan skuldig bevind is dat hy vir Darius Botha se dood verantwoordelik was, vandeesweek ‘n vonnis van 12 jaar gevangenisstraf opgelê.
Die saak is vroeër vandeesweek - Maandag, 31 Maart - na ‘n lang en uitgerekte verhoor wat deur baie probleme, doodloopstrate en krisisse gekenmerk was, uiteindelik afgehandel, het Botha se familie vandeesweek aan Rustenburg Herald gesê.
Dié voorval wat op 26 Maart 2021 tydens ‘n spanbou-geleentheid tussen Murray & Roberts en Impala Rustenburg by ‘n onthaalarea van ‘n bekende skool plaasgevind het, het vir ‘n opskudding gesorg waaroor daar lank bespiegel is en het nou - vier jaar later - vir die oorledene se moeder en susters, sy vrou en twee seuns uiteindelik berusting gebring.
Die familie was in ‘n stadium erg gefrustreer deur die feit dat die saak deur allerlei vertragings gekenmerk is soos toe die dossier in ‘n stadium weggeraak het en die saak daarna (tydelik) van die rol geskrap is. Met die hulp van die Rustenburgse polisie is ‘n nuwe dossier egter aangelê en kon die ondersoek na die saak voortgaan.
Vandag - talle moeilike en hartseerjare na die voorval, bring ons by die einde van ‘n pad wat vir ons familie baie moeilik was, het die oorledene se eggenote vandeesweek aan die Herald gesê.
‘n Drie-en-dertigjare man van Rustenburg - Darnell van der Merwe - is vroeër op aanklagte van moord skuldig bevind en die saak is tot Maandag vandeesweek vir vonnisoplegging uitgestel.
Van der Merwe is uiteindelik ‘n vonnis van 12 jaar gevangenisstraf opgelê waarvan twee jaar vir vyf jaar opgeskort is - hy sal egter tien jaar hiervan moet uitdien, het Rustenburg Herald verneem.
Van der Merwe se regsverteenwoordigers het intussen reeds aangedui dat hulle van voorneme is om teen die vonnis te appelleer - die appél-aansoek sal op 25 April aangehoor word.
