Klerksdorp Rekord, Klerksdorp - Die jaarlikse Toy Run het op Sondag 26 November plaasgevind en dit was weereens ‘n brullende sukses.
Motorfietsryers van die stad het hul sagte kant gewys, en met sakke vol sagte speelgoed opgedaag. ‘n Speelding het jou toegang verseker en verskeie motorfietsyers het met sagte speelgoed op hul ysterperde gery. Daarna het almal lekker saamgekuier.
Spikes Lawrence, organiseerder, bedank die “marshalls” en stad se verkeerdiens wat volgens hom uitstekende werk gelewer het. Motorfietse het ‘n afstand van 65 km afgelê.
“Ons het sowat 170 motorfietse gehad wat aan die ‘mass ride’ deelgeneem het en sowat 30 wat by die Portugese saal gewag het. Sowat 3 000 speelgoed is ingesamel. Ons het so sewe sakke wat net voor Kersfees uitgedeel sal word,” sê hy.
Gerrit Coetzer is die wenner van die Big Boy TSR 125 in die gelukstrekking.
Die volgende Toy Run is geskeduleer vir 24 November 2024, die laaste Sondag van November. Riaan Slabbert het die foto’s geneem.
