Moord in parkeerterrein: Hof hoor hoe eks wou baklei

16 Mei 2025 - Deur Salomé Kotzé

Klerksdorp Rekord, Klerksdorp - ‘n Sigbaar verligte Wernich Botha het Donderdagmiddag 8 Mei uit die beskuldigdebank gestap en sy vrou styf vasgedruk. Albei was emosioneel.

Botha het vir twee dae na die staatsgetuies geluister in sy verhoor vir moord en poging tot moord na ‘n bakleiery voor Cadillacs in September 2023 waarin Hilton Pretorius en PW Roos geslaan is. Pretorius is 18 dae later in die hospitaal dood. Hy ontken skuld op albei klagtes. Adv Hennie du Plessis het gesê sy verweer sal selfverdediging wees.

Botha se eksmeisie, Natasha Fisher (nou van der Merwe) was vir die grootste deel van die twee dae in die getuiebank nadat adv Caswell Ntoyi (vir die staat) haar eerste geroep het om die staat se getuienis af te skop.

Natasha het ‘n paar keer gedurende haar getuienis begin huil, wat die hof verdaag het. Haar man het haar by die hof ondersteun.

Sy het getuig dat sy en Wernich ‘n romantiese verhouding aangeknoop het ‘n paar dae voordat hy na Somalië vertrek het waar hy werk. Hulle het in kontak gebly oor die telefoon en sy het in sy woonstel in Doringkruin ingetrek. 

Sy het intussen haar vriendskap met haar vorige kêrel (Hilton) hervat nadat hy haar om verskoning gevra het oor hoe hy haar behandel het in hul verhouding en gevra het om vriende te wees. Die twee het in Maart 2023 hul verhouding verbreek en is nie op goeie voet uitmekaar nie.

Natasha het getuig dat Hilton die Vrydagaand voor die bakleiery na haar toe gekom het om te sê hy wil voortgaan met hul verhouding. Hulle het ‘n argument gehad en sy het gesê hy moet gaan. Sy het toe gaan slaap. 

Die volgende wat sy van weet is dat Wernich haar op haar skouer wakker tik en Hilton langs haar in die bed lê. Sy het hom eers ‘n paar weke later terug verwag. Wernich het toe glo die slapende Hilton twee keer in die gesig geslaan en uit die bed getrek dat hy langs die bed val. Wernich is toe na buite en nadat sy bloed van Hilton se gesig gevee het, is sy agterna. Hilton het ook na buite gekom en vir Wernich gesê hy gaan hom p**s soos hy gep**s is. Wernich het kalm gebly en sy het vir Hilton gesê hy moet ry. Wernich is toe ook daar weg en sy het op die sitkamerbank gaan lê waar sy aan die slaap geraak het. Wernich het teen 04:00 die oggend teruggekom, gesê sy moet in die kamer kom slaap en die volgende oggend het hulle gaan ontbyt eet.

In kruisondervraging van adv Du Plessis het sy bevestig dat daar 461 boodskappe tussen haar en Hilton was in die tyd wat hy by die huis weg was, tot die voorval in die parkeerterrein voor Cadillacs die Saterdagmiddag. 

In van die boodskappe was Hilton dreigend teenoor Wernich en gesê hy kom vir hom en hy het f*kk*l om te verloor nie. Sy het vir die advokaat gesê sy het geweet Hilton wou wraak neem oor wat die vorige aand gebeur het. Wernich het uiteindelik haar foon geantwoord en vir Hilton gesê hulle is by Cadillacs. 

Hier het Natasha vir Hilton en sy vriend wat saam daar opgedaag het, probeer oortuig om hulle uit te los. Wernich het Hilton toe met een hou grond toe geslaan. Terwyl die verdediging beskryf het dat Wernich toe vir Hilton op sy sy gedraai het, sodat hy nie in sy bloed moet verstik nie, en hom so gehelp het, het adv Ntoyi later in herondervraging getuienis gelei dat dit nie vir Wernich sou nodig wees om noodbehandeling toe te pas as hy nie die slagoffer aangerand het nie. Wernich het dieselfde met Roos gedoen nadat hy hom ook met een hou grond toe gefel het, toe dié aan sy skouer geraak het.

Natasha het verder getuig dat sy saam met Hilton in die ambulans hospitaal toe gery het nadat ‘n paramedikus haar geroep het, omdat hy na haar gevra het. Hy het in die ambulans vir haar gesê hy is lief vir haar. Sy het op ‘n vraag van die verdediging geantwoord dat sy daarna nooit weer met Wernich gepraat het nie.

Die verhoor is uitgestel tot 3 September. 

Die staat se tweede getuie, dr Kagiso Motswane wat Pretorius en PW Roos in ongevalle by Wilmed behandel het, het getuig dat albei wonde aan hul agterkoppe gehad het, nadat hulle op die plaveisel geval het. Dit het tot bloeding op die brein gely. Pretorius se besering was vyf tot tien keer erger as Roos s’n en sy (Pretorius)se toestand het binne ‘n uur so agteruit gegaan dat hy voor sy verplasing na Tshepong Hospitaal in ‘n geïnduseerde koma geplaas is en toe aan ‘n ventilator gekoppel is. Die dokter het getuig die spoed waarmee Pretorius se besering versleg het, was vir hom vreemd. 

“So ‘n besering word gewoonlik veroorsaak deur iets soos ‘n kolf of ‘n harde voorwerp,’’ het hy getuig.

Moordverdagte vry oor staat voete sleep

16 Mei 2025 - Deur Salomé Kotzé

Klerksdorp Rekord, Klerksdorp - Die ouers van ‘n vrou wat eers met ‘n mes gesteek en toe in haar huis doodgebrand het, het verlede week gehoor dat die man wat van haar moord verdink word, nie meer agter tralies is nie.

Die moordsaak teen Quinn van der Bergh is op Dinsdag 6 Mei teruggetrek en die saak is van die hofrol verwyder. Dit kom nadat die saak verskeie kere uitgestel is sodat die Nasionale Vervolgingsgesag (NVG) die saak na die Hooggeregshof kon neem. Die landdros was nie gelukkig met die NVG se voete sleep met die saak nie, en het die saak geskrap. Dit beteken dat Van der Bergh wat sedert hy homself aan die polisie oorhandig het in Oktober 2022 in aanhouding was, verlede week as ‘n vry man uit die hof gestap het.

Gangsters get life plus 15 years

Klerksdorp Record, Jouberton - Four men linked to gang rivalry received double life sentences and additional 15 years each - life for murder and 15 years for arson.

The Acting Provincial Commissioner of Police in North West, Major General Patrick Asaneng, welcomes eight life terms and additional 60 years life imprisonment handed down by the Stilfontein Regional Court on Monday May 12.