Klerksdorp Rekord, Klerksdorp - Verlede week was verjaardagweek by Laerskool Saamtrek met verskeie feesvieringe wat gedurende die week by die skool aangebied is.
Leerlinge het die kans gehad om op ‘n reuse springkasteel/Big Bounce te baljaar waarvan die omtrek seker so groot soos ‘n rugbyveld was. Verskeie aktiwiteite het plaasgevind om die skool se 70ste verjaardag te herdenk.
Op Vrydag 13 September het ouers en oud-leerlinge gefuif by ‘n sewentigs partytjie op die skool se rugbyveld wat nog vir lank onthou sal word.
Die sangeres Cordelia het as gaskunstenaar opgetree en oud-Samie Rinaldo Kritzinger het ook sy kitaar nadergetrek. Dit was beslis die partytjie van die jaar met al die veelkleurige kostuums, karao-ke en heerlike kos.
Klerksdorp Rekord publiseer volgende week ‘n gelukwensing aan Laerskool Saamtrek. Skakel Salomé Kotzé by 079 876 7616 as jy daarin wil adverteer.
