Klerksdorp Rekord, Klerksdorp - Die stad se meesterklapper is genooi om weer sy vernuf in Las Vegas te wys en daar is baie geld op die spel.
Tjaart “Piston” Kruger het bekendheid verwerf toe hy in Augustus 2022 vir Quintus Horn van Centurion in Sasolburg in ‘n “slapfighting”-kompetisie met een klap planke toe gestuur het. Sedertdien neem hy nog aan die nuwe sport deel en gaan binnekort in Las Vegas deelneem. Die prysgeld in Nevada is $10 000 (R183 000) ‘n klap en hy kan $40 000 (R732 000) huis toe bring. Dit is drie klappe en ‘n bonus van $10 000.
Tjaart neem op 25-29 Junie in Las Vegas aan Power Slap 8 deel en hy sê sy plathand gaan praat.
Sy vliegkaartjies is bespreek en hy maak reg vir die byeenkoms. Hy vertel hy sit die tyd om om deur die reëls te werk en te fokus op sy teenstaander.
“Ek kyk waar sy swak punte lê en van daar af fokus ek op myself om te verbeter. Ek doen baie nekoefeninge en eet Wilson-toffies om my kakebeen sterker te maak,” sê hy.
