Klerksdorp Midweek, Klerksdorp - Om die tekens van ‘n beroerte te herken en vinnige mediese aandag te verseker, kan lewensreddend wees en die risiko van langtermyn ongeskiktheid aansienlik verminder. Ter viering van Wêreldberoertedag op Dinsdag 29 Oktober, doen Ayesha Kriel, hoof van siekte- en medisynebestuur by Afrocentric, een van Suid-Afrika se voorste verskaffers van gesondheidsorgoplossings, ‘n beroep op alle Suid-Afrikaners om ingelig te bly oor die simptome van ‘n beroerte en om vinnig op te tree in die gebeurtenis van ‘n noodgeval.
Boekefees bring lesers bymekaar
Klerksdorp Midweek, Klerksdorp - Boekwurms kan solank begin uitsien na die Klerksdorp Boekefees wat die eerste naweek van November gehou word. Klerksdorpers wat die boeke oase by Aardklop gemis het en met verlangende oë na foto’s van die Woordfees op Stellenbosch gekyk het, hoef nie te bekommer nie - heelwat van die skrywers gaan ook die Klerksdorp Boekefees besoek.
Boekefees - oggendprogram
Vrydag 1 November 12:00 Hoe om ‘n bank te bou
In TJ Strydom se boek Capitec - Stryd met die grotes vertel topverkoperskrywer die boeiende storie van Capitec, die demokratiese era se grootste sakesuksesverhaal, wat selfs as die beste bank ter wêreld aangewys is. Hoe bou jy ‘n bank van nuuts af? Wat verg dit om die vier gevestigde bankreuse die stryd aan te sê, en dan boonop die loef af te steek? Kom luister na hierdie eg Suid-Afrikaanse verhaal van visie, vernuwing en deursettingsvermoë. Onontbeerlike leesstof vir entrepreneurs. Klerksdorp-sakeman, Ferdie Swanepoel sal met hom in gesprek wees. Gratis bywoning.
Boekefees - middagprogram
17:30 Beeld 50 jaar - om ‘n groot storie hard te slaan
Vyftig jaar se stories in een bundel saamgevat. Die nuus dat Beeld na jare sy gedrukte koerant gaan staak, is met skok aangehoor. Juis daarom is hierdie bundel ‘n versamelaarsitem vir elke koerantleser. Voormalige Beeldjoernalis en skrywer, Susan Cilliers gesels met die samesteller van die bundel, Erika de Beer.
Boekefees - aandprogram
19:00 Seun ons gaan border toe
Dana Snyman se boek, Seun is ‘n memoir maar tog ook nie, want dit vertel die storie van soveel seuns van die tagtigerjare wat vir diensplig opgeroep is.
Deon Lamprecht vertel die verhale van oorlewendes van Operation Smokeshell in 1980 in sy boek Bloedbroers. Dit werp ook lig op wat met soldate gebeur nadat die laaste skote afgevuur is en volg die veterane toe hulle vier dekades ná die operasie vir die eerste keer na die slagveld teruggekeer het.
Die ondersoekende joernalis De Wet Potgieter gesels met Dana en Deon oor die grensoorlog en hoe die spoke nie wil gaan lê nie. Of jy nou daaroor wil lag of huil, almal het ‘n seun op die border gehad.
Riku Latti en Bacchus Nel kuier saam en maak musiek.
More Articles …
