Klerksdorp Midweek, Klerksdorp - Die sperdatum vir begunstigdes van die Suid-Afrikaanse Agentskap vir Maatskaplike Sekerheid (SASSA) om hul goue kaarte vir Postbank swart kaarte om te ruil, is van 28 Februarie tot 20 Maart verleng. Dit is Vrydag 14 Februarie in ’n gesamentlike verklaring deur die minister van kommunikasie en digitale tegnologie, Solly Malatsi en die minister van maatskaplike ontwikkeling, Nokuzola Tolashe, aangekondig.
“Ons het geluister na die bekommernis en frustrasies van ons maatskaplike toelae-begunstigdes, en ons vertrou dat hierdie verlenging broodnodige tyd vir toelae-ontvangers sal bied. Ons moedig begunstigdes sterk aan om die verandering aan die Postbank swart kaart so gou moontlik te maak, ver voor die sperdatum van 20 Maart,” het die ministers gesê.
Hulle het begunstigdes verseker dat toelaebetalings soos gewoonlik sal voortgaan, selfs ná die sperdatum.
As begunstigdes nie hul kaarte teen daardie tyd omgeruil het nie, sal hul toelaes steeds betaal word, maar hulle sal hul naaste poskantoor moet besoek om toegang tot hul fondse te kry.
Om die oorgang te vergemaklik, werk die twee departemente saam om personeelkapasiteit te vergroot en met kleinhandelaars saam te werk om die aantal kaartruilweb-werwe regoor die land uit te brei. Mobiele kantore sal ook na landelike gebiede ontplooi word om te verseker dat soveel mense moontlik bystand ontvang.
“Ons sal die proses noukeurig monitor en daaglikse opdaterings ontvang om enige uitdagings wat vinnig mag opduik, aan te spreek.
“Verder is die sperdatum van 20 Maart die datum wanneer SASSA goue kaarte sal ophou werk, nie die laaste dag om vir die nuwe kaart aansoek te doen nie. Begunstigdes sal steeds na hierdie datum aansoek kan doen om hul Postbank swart kaarte te ontvang,” het die ministers gesê.
Die twee departemente werk ook saam met gemeenskapsleiers en plaaslike owerhede om te verseker dat duidelike inligting gedeel word en hulp verleen word waar nodig.
“Om te verseker dat begunstigdes hul ou SASSA goue kaarte met gemak kan omruil, is ons prioriteit, en ons sal gereelde opdaterings aan die publiek verskaf,” het die verklaring afgesluit.
In die Klerksdorp-omgewing kan SASSA-kliënte slegs aansoek doen vir nuwe kaarte by Shoprite-takke by Klerksdorp Terminus en in Kanana.
Mense het aan Klerksdorp Midweek gesê hulle is bang om na die taxi-terminus te gaan weens hoë misdaad.
