STELLALANDER-VRYBURG: Padel-tennis, een van die vinnigste groeiende sportsoorte in Suid-Afrika, en maak binnekort sy merk in Vryburg.
Hierdie opwindende sport, wat ‘n unieke kombinasie van tennis en muurbal is, is perfek vir mense van alle ouderdomme en vaardigheidsvlakke.
Die voormalige Vryburg Tennisklub in Warrenweg kry nuwe lewe danksy Johan Hamman en Christopher Kingston se inisiatief om twee moderne padelbane op te rig.
Hierdie ontwikkeling sluit ook ’n sportwinkel in wat spesialiseer in padel-toerusting, asook ’n gelisensieerde restaurant op die perseel, wat ’n volledige ervaring vir sportliefhebbers en gesinne sal bied. Sedert die eerste padelbaan in Kaapstad in 2020 gebou is, het die sport vinnig regoor die land versprei, met bane wat reeds beskikbaar is in groot stede soos Johannesburg en Durban, sowel as kleiner dorpe soos Schweizer-Reneke, Klerksdorp en Hartswater. Vryburg sluit nou aan by hierdie groeiende netwerk van padelgeriewe. Padel het wêreldwyd meer as 25 miljoen spelers in 90 lande. Spanje is die voorloper, met meer as 20,000 bane en 6 miljoen spelers. Europese lande soos Italië en Argentinië het ook groot spronge gemaak, en daar is tans 15,000 nuwe bane in aanbou regoor Europa. Wat die sport uniek maak, is dat die bane omhein is, en spelers mag die mure gebruik om die bal te speel, wat ‘n dinamiese dimensie tot die spel voeg. Padel-rakette is stringloos en robuust, terwyl padelballe kleiner en minder veerkragtig is as gewone tennisballe. Padel-liefhebbers kan die Playtomic-toepassing aflaai om baanbesprekings te doen wat in Vryburg tussen R220 (07:00 en 16:00) en R300 per uur (16:00 tot toemaak), of sowat R55 tot R75 per speler beloop. Rakette kan gehuur word tussen R25 en R50 per raket per sessie of kan aangekoop word. Die nuwe padelbane in Vryburg sal binnekort en wel voor Kersfees vanjaar gereed wees, net betyds vir die vakansie-seisoen. “Ons is opgewonde om hierdie projek aan die gemeenskap bekend te stel en glo dat dit groot waarde sal toevoeg tot sport en ontspanning in Vryburg,” sê Hamman en Kingston. Hierdie inisiatief sal nie net nuwe energie na die ou Tennisklub bring nie, maar ook die plaaslike ekonomie ondersteun deur toerustingverkope en kulinêre ervarings. Die gemeenskap en veral sportliefhebbers kan uitsien na ‘n heerlike kombinasie van gesellige, gesonde en opwindende oomblikke saam met familie en vriende.
