GEMSBOK-KURUMAN: ‘n 48-jarige buitelander het vandeesweek in die Kuruman-landdroshof verskyn, omdat hy na bewering ‘n skema bedryf het om vervalste voertuiglisensieskyfies te vervaardig en te verkoop, wat kliënte in staat stel om die Verkeersdepartement se hernuwingsproses vir slegs R350 te ontduik.
Vincent Christian Mkumbo, bekend as “Chris”, het vandeesweek vlugtig in die Kuruman-landdroshof verskyn weens beweerde kuberbedrog.
Volgens ao Nomthandazo Mnisi, die woordvoerder van die Valke in die Noord-Kaap, word die Tanzaniese burger daarvan beskuldig dat hy ‘n skema bestuur het om vervalste voertuiglisensieskyfies te vervaardig en te verkoop.
Hierdie operasie, wat daarop gemik was om kliënte te help om die burokratiese rompslomp van die Verkeersdepartement te ontduik, het glo behels dat kliënte ‘n lisensieskyf met ‘n verlengde vervaldatum voorsien word.
Mnisi het verduidelik dat Mkumbo ou voertuiglisensieskyfies wat verval het, sal ontvang en vir net R350 kan kliënte ‘n drukstuk van dieselfde lisensieskyf afhaal, wat nou met ‘n verlengde vervaldatum spog.
Die Valke se ernstige korrupsie-ondersoek-span het op 3 Oktober 2024 vinnig opgetree en ‘n soek- en beslagleggingsoperasie by ‘n plek in Promise Land, Kuruman, uitgevoer.
Tydens die klopjag het ondersoekers beslag gelê op kritieke bewyse, insluitend ‘n rooi en swart USB-geheuestokkie en Mkumbo se selfoon, wat as deel van die voortgesette ondersoek - ondersoek sal word.
Mkumbo is onmiddellik gearresteer en het op 4 Oktober 2024 in die Kuruman-landdroshof verskyn vir beweerde kuberbedrog, alternatiewe bedrog, alternatiewe vervalsing en uitlatings.
By sy hofverskyning is borgtog van R500 aan Mkumbo toegestaan met die voorwaarde dat hy die ondersoekbeampte te alle tye op hoogte moet hou van waar hy hom bevind indien hy Kuruman verlaat.
Soos die ondersoek ontvou, is die saak tot 5 Desember 2024 uitgestel.
