GEMSBOK-SPRINGBOK: Met die doel om te inspireer en in te lig, is 'n Loopbaan opedag onlangs in Springbok vir graad 12-leerders gehou.
Befonds deur Kangnas Windplaas het byna 100 studente van die omliggende plaaslike gemeenskappe die voorreg gehad om verskillende opvoedkundige geleenthede te verken.
Die doel was om aan leerders insig te gee oor die verskillende geleenthede wat aan hulle beskikbaar is deur middel van hierdie windkragaanleg se opvoedkundige inisiatiewe, insluitend beurse wat befonds word om finansiële struikelblokke aan te spreek.
“Die belangrikheid van sulke inisiatiewe kan nie oorbeklemtoon word nie. Baie studente staar beduidende finansiële struikelblokke in die gesig, wat hulle verhoed om hul opvoedkundige doelwitte na te streef. Beurse speel 'n kritieke rol om hierdie laste te verlig, wat studente in staat stel om op hul studies te konsentreer sonder die voortdurende bekommernis oor befondsing.
Hierdie beurse verhoog nie net toegang tot onderwys vir studente uit lae-inkomste-agtergronde of onderverteenwoordigde groepe nie, maar bevorder ook opvoedkundige gelykheid en geleenthede,” het Rouchet Daniels, ekonomiese ontwikkelingsbestuurder van Kangnas-windkragaanleg, verduidelik.
Deelnemers het die geleentheid gehad om met rolspelers te skakel, insluitend verteenwoordigers van Xhaus Development, NCR TVET Kollege en StudyTrust, wat teenwoordig was om hulpbronne en leiding te deel.
Die NCR TVET Kollege het noodsaaklike inligting verskaf oor studiegeleenthede, beursopsies en aansoekprosesse. Intussen het StudyTrust gedetailleerde inligting oor die Kangnas-beursskema gedeel, insluitend geskiktheidsvereistes, aansoekprosedures en belangrike sperdatums. Xhaus Development het die leerders verder ondersteun deur psigometriese toetse uit te voer om hulle te help, om die studierigtings te identifiseer, wat die beste by hul sterkpunte en belangstellings pas.
"Hierdie geleenthede is baie voordelig en nodig in ons gemeenskappe omdat dit 'n platform bied vir leerders om inligting te kry oor tersiêre instellings,” het Juandre Mentor, van Xhaus Development, gesê.
