Die afgelope naweek het die eerste tweekamp-byeenkoms vir die nuwe jaar by die Hoërskool Duine-veld plaasgevind.
Onder ’n bloedrooi son op ’n baie warm middag, het die twee-kamp begin.
“Ons wou hê dat dit ’n dag is waaraan almal – van die atlete tot die toeskouers – met genot kan terugdink,” het mnr. Frans du Plessis, die hoof van Upington Tweekamp, verduidelik.
Die deelnemers was ’n diverse groep, wat die gees van inklusiwiteit en gemeenskap weerspieël het.
Die jongste deelnemer, was slegs ses jaar oud.
Sy het onder groot applous haar wedren voltooi, en haar glimlag het gewys dat sy elke oomblik geniet het.
Aan die ander kant van die ouderdoms-spektrum het mev. Cecilia Bray, ‘n dinamiese meester van meer as 70 jaar oud, weereens bewys dat ouderdom geen beperking is as jy passievol is oor jou sport nie.
Haar deursettingsvermoë en entoesiasme het groot bewondering ontlok.
Toeskouers het langs die baan gesit, hul gesinne om hulle, terwyl hulle die atlete aangemoedig het.
“Ek dink dit is wonderlik hoe hierdie geleentheid ons almal bymekaar bring,” het Lihette du Plessis, ’n ouer, opgemerk. “My kinders is nie net gemotiveerd om aktief te wees nie, maar ons as ouers raak ook deel van die pret.”
Die tweekamp van Vrydag het nie net die gemeenskap weer bymekaar gebring na die Desember-vakansie nie, maar het ook ’n voorbeeld gestel van hoe sport en samehorigheid hand aan hand gaan.
Ons sien met afwagting uit na die Griekwaland-Wes Kampioenskappe wat plaasvind in Upington op die 22ste Februarie 2025.
Top Atlete van die dag:
1ste – Llewellyn Orffer (Laerskool Oranje-Noord) met 2081.25 punte
2de – McNeil De Waal (Laerskool Oranje-Noord) met 2075.33 punte
3de - Reinhardt Hatting (Laerskool Oranje-Noord) met 2066.03 punte (PB)
