Klerksdorp Rekord, Hartbeesfontein - ‘n Private teelplaas vir tiere en renosters in Viëtnamese besit buite Hartbeesfontein was verlede week weer in die kollig na ‘n besoek van die DBV.
Dit is ook nie die eerste keer dat die veelbesproke Voi Lodge in die nuus is nie met sover terug as 2013 dat die wildsplaas verbind word met die internasionale handel in renosterhorings en tierbeendere. Met die DBV se besoek aan die plaas op Maandag 24 Maart, het die inspekteurs ‘n tier van kant gemaak wat “ondenkbaar gely’’ het.
Luidens ‘n persverklaring deur die DBV was dié besoek deel van ‘n inspeksie na ‘n vorige voorval waar ‘n tier drie weke gelede deur ‘n ander tier doodgebyt is wat beserings aan die dier se bolyf, keel en nek veroorsaak het. Die DBV wou seker maak dat die beseerde dier deur ‘n veearts behandel is. “Wat ons eerder gevind het, was meer as steurend. Die gewonde tier was verwaarloos. Sy het so aan haar voorpote geknaag, gelek en gekrap dat sy haar bene en senings ontbloot het. Haar naels was heeltemal weggedra - behalwe vir een - wat rou, deurdringende been duidelik sigbaar gelaat het. Die dier kon nie behoorlik loop nie en is gesien hoe sy sukkel selfs toe kos voor haar geplaas is.’’
Niemand het iets gedoen om die dier te help nie en hulle het die dier van kant gemaak. Die eienaar het geweier dat hulle die karkas verwyder.
Volgens die DBV is die fasiliteit lank reeds onder die loep vanweë sy bande met die onwettige roofdierbeenhandel en ander kriminele ondernemings. “Ten spyte van gereelde inspeksies, het wetlike skuiwergate en die versuim van provinsiale owerhede om voldoende welsynstandaarde af te dwing, word bedrywighede soos hierdie toegelaat om voort te gaan onder die dekmantel van wettige teling.”
Die eienaar van die fasiliteit het ook nie op versoek die vereiste permitte vir die tiere gegee nie, wat die twyfel laat bestaan of hulle wel aan nasionale en internasionale bewaringsregulasies voldoen.
Tiere word beskerm ingevolge die Konvensie oor Internasionale Handel in Bedreigde Spesies van Wilde Fauna en Flora (CITES), wat die handel in tierbene en afgeleide produkte streng reguleer om die uitbuiting daarvan in terme van internasionale handel te voorkom.
Die DBV is besig om ‘n dossier saam te stel. “Ons sal hierdie saak tot die volle omvang van die wet vervolg. Ons sal nie bystaan terwyl diere ondenkbare lyding verduur in die hande van winsgedrewe telers nie. Die publiek moet die realiteit van Suid-Afrika se roofdierbedryf verstaan. Agter die hoë heinings van fasiliteite soos hierdie ly diere in stilte vir finansiële gewin. Die NDBV sal voortgaan om hierdie wrede operasies aan die kaak te stel en te veg vir die welsyn en welstand van alle wild.’’
