Klerksdorp Rekord, Orkney - Niggies, KykNet se nuwe dramareeks oor die moord op twee tienermeisies in die Vrystaat in 1966, het verlede week begin en kykers was vasgenael voor hul TV’s.
Ethel Nel, ‘n inwoner van Orkney, het ook gekyk. Sy het op Dinsdag 1 April met Klerksdorp Rekord gepraat oor die reeks en haar verbintenis met Petro Nel, een van die niggies wat so wreed verkrag en vermoor is. “Ek en Petro is regte niggies. Sy was my pa se broer se dogter,” vertel sy.
Ethel was in 1966 in Mafeking op skool en 13 jaar oud toe die moorde plaasgevind het. Petro was ‘n jaar jonger as sy.
“My oom het my pa gebel en hom vertel wat gebeur het. My pa was erg geskok en het dadelik Odendaalsrus toe gery. Ons kinders was verslae. Ons het altyd saamgespeel wanneer ons vir ouma en oupa op die plaas op Vierfontein gaan kuier het en skielik was sy weg.”
Sy vertel dat haar ouers by die begrafnis was en die kinders agtergebly het. “Dit was baie erg vir ons. Hulle is wreed vermoor en vermink deur die verkragting. Ons kon nie daarmee vrede maak nie. Toe ek verlede week kyk, het dit my weer erg geraak. Ek dink dit het almal erg geraak wat gekyk het,” sê sy.
Sy vertel dat sy nêrens alleen mag gegaan het na die moorde nie en dat sy altyd of haar broer of hul bokserhond by haar moes gehad het.
Ethel is ontsteld omdat die reeks volgens haar “nie baie feitelik’’ is nie. Volgens haar was haar oom (Petro se pa) nie by toe die lyke gekry is nie en Petro het twee broers gehad wat glad nie eens genoem word in die reeks nie. Dit lyk nou of sy glad nie boeties gehad het nie.
Sy beplan om die reeks klaar te kyk, want sy wil sien hoe die verhaal uitgebeeld word.
“Ek wil graag sien hoe hulle die twee moordenaars gaan uitbeeld. Die een het kop-eerste van ‘n hotel in Bloemfontein gespring en die ander een is in die tronk ge-split. Hulle was regte gemors.”
Niggies word Dinsdae-aande om 20:00 op kykNet uitgesaai.
