Klerksdorp Rekord, Klerksdorp - Klerksdorpers moet liefs hul motors snags in geslote motorhuise parkeer of hul sekuriteit opskerp as hulle hul motorwiele wil behou.
Só waarsku ‘n plaaslike sekuriteitsmaatskappy nadat wiele die afgelope ruk weer by heelparty huise in verskillende Klerksdorpse woonbuurte gesteel is.
Net Donderdagaand 20 Maart is vier voorvalle aangemeld waar motorwiele in erwe afgesteel is. Die vorige naweek was daar ook vier gevalle in Doringkruin aangemeld.
Wieldiewe slaan gewoonlik laat snags of vroeg soggens toe. Wat die slagoffers nog meer omkrap is dat hierdie diewe boonop so astrant is en selfs hul plaveisel oplig en dan die stene gebruik om die motors op te sit.
Klerksdorp Rekord het ook verneem dat gholfkarretjies en sleepwaens se wiele net so gesog is onder diewe. Motorbande en vellings in die 14/15 duim grootte is ook gewild.
Die polisie ondersoek verskeie diefstalsake waar motorwiele gesteel is.
