Klerksdorp Rekord, Orkney - Gewapende mans wat in ‘n bruin Mini Cooper rondry, word by verskeie voorvalle betrek waar daar glo die afgelope ruk probeer is om kinders te gryp.
Die jongste geval was by ‘n Laerskool op Orkney waar die mans glo probeer het om ‘n tweejarige dogtertjie uit haar ma se arms te gryp. Sy het buite die skool parkeer toe die Mini Cooper by haar stop.
Cherise Erasmus wat die geskokte ma minute na die voorval in die skoolkantoor gekry het, het ‘n boodskap op veiligheidsgroepe per Whatsapp gestuur om mense van die voorval in te lig. “Ek het net geweet mense moet hiervan weet. Die arme ma was so geskok, sy het omtrent gerattle. Die mans het weggery nadat sy baklei het om haar kind te hou. Ek dink hulle was bang hulle word gevang.”
So twintig minute later het CSS Sekuriteit gereageer op ‘n noodroep van ‘n vrou wat beweer sy is amper geroof deur dieselfde groep mans in ‘n Mini Cooper.
Op 20 Februarie het Mariné Kearney ‘n foto op Facebook geplaas van ‘n man by ‘n Mini Cooper. Sy het mense gewaarsku dat die insittendes verdag voorkom. Sy het by ‘n Laerskool gewag vir haar dogter terwyl haar seuntjie op die grasperk voor haar motor gespeel het. Die Mini Cooper het skielik voor haar motor gestop. “Een klim toe uit. Ek skree vir Beandro om dadelik te kom inklim. Die man spring toe terug en hulle jaag weg. Ek is seker hulle wou vir Beandro gryp...’’ het sy geskryf. Die plasing is meer as 1 000 keer gedeel en CSS staan deesdae by die skool met hul voertuie.
Nog inligting dat die motor ook al by ander laerskole opgemerk is, is deur bekommerde ouers gedeel.
Die polisie het nog nie ‘n amptelike klag oor die voorval gekry nie en kan dit dus nie ondersoek nie. Kol Adele Myburgh, polisiewoordvoerder, het die publiek weereens gemaan om sulke voorvalle by die polisie aan te meld. Klerksdorp Rekord het verneem dat die polisie ontbied is na die voorval op Orkney.
