Klerksdorp Rekord, Klerksdorp - ‘n Veertienjarige skoolseun van Pretoria wat verlede week in die stad kom hokkie speel het, is die jongste slagoffer van misdaad in die middestad.
Die kind, een van ‘n tweeling, is met ‘n mes gesteek. Hy het steke vir die wond in sy skouer gekry en sal waarskynlik op anti-retrovirale middels moet gaan as deel van sy behandeling. Hy was deel van ‘n besoekende skoolspan wat by KHS ‘n hokkiewedstryd gespeel het. Die span het Donderdagmiddag 20 Maart op pad terug huis toe by die Mccafé in die hoofstraat gestop om kos te koop.
Volgens kol Adele Myburgh, polisiewoordvoerder, was die seun wat gesteek is, se tweelingbroer buite die kitskoseetplek by die bus om iets te kry terwyl die res van die span binne die winkel was. “Hy is deur twee mans genader en een het ‘n mes tevoorskyn gebring. Hulle het hom probeer roof maar die klomp seuns binne die winkel het na buite gestorm en die rowers verwilder. Dit is in die onderonsie dat een van die seuns in die skouer met ‘n mes gesteek is. Die rowers het laat spaander sonder om enige iets te buit.’’
Die polisie ondersoek ‘n saak van poging tot moord. Die ondersoekbeampte adjoff Fred Leach vra dat enigiemand wat die voorval gesien het, hom skakel by 082 416 0812.
Klerksdorp Rekord het net verlede week weer berig oor hoe onveilig mense in die middestad voel na verskeie voorvalle van geweld teen besoekers aan Binnelandse Sake.
