Klerksdorp Rekord, Orkney - Die rioolinfrastruktuur in Orkney is besig om in duie te stort en niemand doen blykbaar iets daaraan nie.
DA-rdl Johan Bornman voel hy staan teen ‘n muur sonder antwoorde vir inwoners wat gedurig kla oor riooldreine wat oorloop. Hy sê hy staan op die punt om die Groen Skerpioene te vra om in te gryp, aangesien die erns van hierdie kwessie onmiddellike optrede vereis.
“Inwoners en besighede het al meer as twee maande lank ondraaglike toestande verduur weens oorvol riool, wat veroorsaak word deur verwaarloosde en mislukte infrastruktuur. Pypleidings stort ineen, pompe breek en daar is ‘n gebrek aan munisipale hulpbronne wat die krisis vererger, met niks wat gebeur van die verantwoordelike departement nie,” sê hy in ‘n verklaring.
Dit lyk asof die lys probleme rondom rioolinfrastruktuur in Orkney eindeloos is. Met die konstante reën die laaste paar dae het dit die probleem net vererger.
Volgens Bornman is verskeie klagtes vir weke aaneen sonder toesig gelaat.
“Dit is onaanvaarbaar. Inwoners word gedwing om in ongesonde omstandighede te leef weens die groot probleem met die vervalle infrastruktuur en gebrek aan inspanning van die betrokke departement. “Ons benodig dringende ingryping om te verseker dat rioolprobleme opgelos word, dat spanne die nodige gereedskap het en vervoer kry om die werk te doen, en dat rioolinfrastruktuur gereeld in stand gehou word.’’
