Klerksdorp Rekord, Klerksdorp - Dit is nou net bietjie meer as ‘n maand na die gru-botsing waarin die spiesgooi-afrigter Erich Wiese ernstig beseer is. Nou vier hy puik uitslae van sy junior atlete by die afgelope SA kampioenskap.
Wiese was langs die baan toe Alto Wiggett (o13) ‘n nuwe SA rekord gooi met ‘n afstand van 56,02m. Nog ‘n o13-atleet, Nelike van der Berg, het ook ‘n goue medalje gewen met haar laaste gooi van 37,42m. Albei word deur hom afgerig.
Die twee spiesgooi-atlete is albei in Laerskool Saamtrek en Wiese vermoed dit is die eerste keer dat dieselfde skool in die dieselfde item en dieselfde ouderdomsgroep goud wen - een vir seuns en een vir meisies.
Wiese het volkome herstel na die botsing die nag van 20 Februarie waar daar aanvanklik vir sy lewe gevrees is. Hy is na ‘n paar dae in die hospitaal ontslaan en was vir ‘n ruk buite aksie terwyl hy van ‘n sleutelbeenfraktuur herstel het.
Nou is hy weer perdfris en gesond en het vandeesweek by ses van sy hoërskool atlete aangesluit wat aan die ASA kampioenskap in Kaapstad deelneem.
