Klerksdorp Rekord, Klerksdorp - Die afgelope sewe weke het 16 besighede se rolbalspanne mekaar die stryd aangesê op Klerksdorp se rolbalbane in die besigheidsliga.
Van hospitale tot siviele ingenieursmaatskappye het teen mekaar meegeding in die sosiale liga.
Groepfases is oor ‘n tydperk van ses weke gespeel en toe is dit tyd vir die finale wedstryde. Nadat die “stof gaan lê” het was dit weereens die sterk span van Trans TV wat weggestap het met die goue medalje nadat hulle die ewe sterk span van Konica Minolta geklop het.
Die brons medalje is verower deur Westvaal Motors wat vir Northwest Nashua tot oorgawe gedwing het in ‘n wedstryd om die derde plek.
Die skildwenners is CU-Brokers, plaat wenners is Life Anncron met Khoisan Roads wat wegstap met die houtbak.
Die houtlepel is gegee aan die span wat die meeste vriende gemaak het deur die toernooi en dit gaan aan die voedingspan van Konica Minolta, die Rolling Stones.
Klerksdorp Rolbal bedank besighede vir die ondersteuning tydens die reeks en was beïndruk met die lekker gees en kompeterende gesindheid wat geheers het regdeur die toernooi.
Nog sulke toernooie word beplan vir die nuwe jaar. Belangstellendes kan André skakel by 082 418 5729.
