Klerksdorp Rekord, Klerksdorp - ‘n Klerksdorper is in Rolbal SA se span ingesluit wat volgende jaar aan die wêreldkampioenskap vir gestremde rolbalspelers gaan deelneem.
Die toernooi vind in Ekhurhuleni plaas gedurende Mei en rolbalspelers van tien lande kom hier deelneem.
Pikkie Loots is ‘n voorbeeld van deursettingsvermoë na ‘n tref-en-trap ongeluk drie jaar gelede waarin hy sy linkerbeen verloor het. Pikkie was voor die ongeluk ‘n kranige rolbalspeler en het selfs die Noordwesspan gelei. Dit het ‘n rukkie geneem maar met sy positiewe gesindheid het hy eers in ‘n rystoel en nou op ‘n kunsbeen weer die sport begin beoefen.
“Wat `n groot eer en respek vir `n mens wat deur al die hartseer en pyn en lyding gegaan het, wat `n voorbeeld vir almal. Namens Klerksdorp Rolbal wil ons vir Pikkie in al sy vasbyt en pad vorentoe alles van die beste toewens,’’ het Henry Peens van Klerksdorp Rolbal gesê.
