Klerksdorp Rekord, Klerksdorp - Sestien plaaslike besighede het die afgelope ses weke sake uitgespook op die rolbalbaan van Klerksdorp Rolbalklub in die sakeliga.
Die mededinging was straf en die geesdrif was groot maar gesonde wedywering was aan die orde van die dag.
Die spanne het in 10 wedstryde meegeding wat ‘n semi-finaal en die finale rondte ingesluit het. Verlede jaar se kampioen, Trans TV het weer die goue medalje gewen deur die gedugte span van Autovest in die finaal te troef. Spel van hoë gehalte was gelewer maar toe die stof gaan lê was dit Trans TV se balle wat die wen bewerkstellig het. Konica Minolta het die brons medalje voor Oranje Toyota weggeraap.
Life Anncron Hospitaal het die skild trofee gewen, Khoisan Roads die plaat en Gasman die houtbak. Die beste gees is gewen deur NTT Nissan.
Klerksdorp Rolbal se bestuur het al die deelnemende besighede bedank vir hul ondersteuning. Belangstellendes kan gerus vir André Olivier skakel by 082 418 5729 om meer uit te vind oor volgende jaar se sakeliga.
