Klerksdorp Rekord, Klerksdorp - The B Gallery het met ‘n paar plaaslike kunsonderwysers saamgespan en ‘n kunsuitstalling van kinderkuns gehou.
Dit was vir Zet Havenga van The B Gallery ‘n droom wat waargeword het om ‘n uitstalling te hou waaraan jong kunstenaars deelneem. “Ek wou dit al lankal doen en gelukkig het Mezelle Pretorius die leisels vasgevat en daaraan gereel en verlede Vrydagaand kon ons die kinders en hul ouers by die gallery onthaal vir die amptelike opening.’’
Mezelle is ‘n kunsonderwyser en eienaar van The Art Studio en sy het haar kontakte in die kunsbedryf bymekaar gekry om die uitstalling gestalte te gee. Uiteindelik het kunsleerlinge van Laerskole Saamtrek en Roosheuwel, Curro en Hoërskool Wesvalia en HTS aan die uitstalling deelgeneem saam met kunsstudente van The Art Studio. Kontantpryse was op die spel in verskillende ouderdomsgroepe.
Die uitstalling kan nog tot 14 Oktober by die gallery besigtig word. Die gallery is ook op Sondae oop.
