Klerksdorp Rekord, Klerksdorp - Jaco Strydom het verlede naweek ‘n groot mylpaal bereik in klubrugby.
Jaco, haker van Klerksdorp Rugby, het sy 200ste wedstryd op Saterdag 10 Mei vir die klub gespeel.
Hy vertel hy speel die afgelope 16 jaar klubrugby - 12 jaar vir Klerksdorp, een jaar vir Vaal Reefs asook drie jaar vir Hurricanes. Hy het ook vier jaar vir die Luiperds se Plattelandspan gespeel.
Hy was in Hoërskool Stilfontein en het net na skool begin klubrugby speel. Hy is nou 35 jaar oud en be-oog om nog so twee jaar te speel. Hy het geen ernstige beserings nie.
Sy grootste ondersteuners is sy gesin. “My drie kinders en my vrou, Geraldine, is by elke wedstryd.”
Die jongste, WJ, hy is 2 jaar oud, het voor hom uitgedraf die afgelope naweek en volgens sy pa is hy rugbymal.
Jaco het sy eie se-kuriteitsonderneming en is ‘n Blou Bul en skree vir die Springbokke, “Obviously.” lag hy.
Klerksdorp Rugby het teen Northam Wolves gespeel. Die tweedes het 36-7 verloor en die besoekers se eerstespan het 60-28 gewen. Klerksdorp en Impala meet kragte op 17 Mei.
