Klerksdorp Midweek, Klerksdorp - Die 19de jaarlikse SA Nasionale Parkeweek het dalk geëindig, maar jy kan steeds die Faan Meintjes Natuurreservaat gratis besoek. Die munisipaliteit nooi inwoners om die natuurreservaat gratis te besoek tot Vrydag 4 Oktober. Dit is nodig om jou SA ID saam te neem vir gratis toegang.
Gratis toegang sluit wel nie gratis toegang tot verblyfgeriewe in nie.
Dit is die perfekte geleentheid om op ‘n weeksdag ‘n piekniek in die park te hou, al het die skole reeds begin. Die park het ‘n pragtige piekniekterrein met braaiers. Dit is omhein en veilig, maar jy kan verras word deur ‘n meerkat of ‘n eekhoring.
Die reservaat is ‘n tuiste vir meer as 41 groot soogdiere. Benewens die skaam swartwitpense is daar ook ‘n aantal ander soogdiere, insluitend oryx, waterbokke, baie rooibokke en rooihartbeeste en ander Acacia-bosveldspesies soos kameelperde, maar daar is geen groot roofdiere binne die reservaat nie. Die kameelperde is glo twee kleintjies ryker!
Faan Meintjes Natuurreservaat is 1200ha groot en is sowat 16 km noord van die stad geleë. Die park is oop van 08:00 tot 16:00. Moenie dié geleentheid mis nie.
