Klerksdorp Midweek, Klerksdorp - As jy op soek is na positiewe, opvoedkundige aanlynvermaak vir die kleinspan, dan is Klara Klets die antwoord. Met ’n sprankelende persoonlikheid, kleurvolle beelde en prettige storievertelling, wen Klara vinnig die harte van kinders én ouers. Die treffende temalied is geskryf en gesing deur die talentvolle Len Muller. Klara Klets se inhoud strek verder as net stories en speletjies. Sy bied ook ’n spesiale reeks aan wat handel oor kinderveiligheid, waar kinders op ’n speelse maar ernstige manier leer hoe om hulself in verskeie situasies te beskerm. Boonop het sy video’s wat Duits en Engels aanleer, wat jong kykers blootstel aan nuwe tale en kulture.
“Ek wou iets maak wat soos speeltyd voel, maar wat steeds belangrike vaardighede aanleer - of dit nou taal, vriendelikheid, nuuskierigheid oor die wêreld of persoonlike veiligheid is,” sê Lucy Verster, die skepper van Klara Klets.
Lucy, wat agter die ontwerp én die konsep staan, is ’n trotse NWU Pukke-alumna met ’n BA-graad in Kommunikasie en ’n Honneursgraad in Onderwysbestuur. Met haar opvoedkundige agtergrond en passie vir kreatiewe leer, verseker sy dat elke video nie net vermaaklik is nie, maar ook opvoedkundig waarde toevoeg.
Hoewel Klara se video’s reeds aandag trek op YouTube en sosiale media, bly sy trots plaaslik, en vervaardig sy haar inhoud reg hier in Suid-Afrika. Sy put dikwels inspirasie uit plaaslike stories, omgewings en kultuur, wat kinders inhoud gee waarmee hulle kan identifiseer. Ouers en onderwysers prys Klara Klets vir haar positiewe invloed, kreatiewe benadering tot leer, en toewyding tot veiligheid en taalontwikkeling. Haar groeiende aanlyn-teenwoordigheid bewys dat kinders se inhoud tegelyk pret, opvoedkundig én betekenisvol kan wees.
Klara Klets se opvoedkundige videos kan gesien word op YouTube, heeltemal gratis. Luisterstories is ook op Spotify beskikbaar.
