Klerksdorp Midweek, Klerksdorp - Amira Willighagen is eersko-mende naweek in Potchefstroom by die NG Kerk Miederpark te sien en volgende maand by die Hervormde Kerk Môrester in Klerksdorp. Die Potch-konsert vind op Sondag 6 April plaas en die konsert in Klerksdorp op 9 Mei.
Dié Nederlandse nagtegaal het ‘n Klerksdorp-konneksie want haar ma, Frieda Brandt was in Hoërskool Wesvalia! Amira het pas haar 21ste verjaardag gevier en sy studeer tans opera aan die Universiteit van Pretoria.
Haar vertoning in Potchefstroom is getiteld Music Go Round en bevat van haar operamusiek, so ook musiek uit musiekblyspele soos Mary Poppins en The Sound of Music. Dié vertoning sal ook vertonings van plaaslike kore bevat. Dit vind ten bate van haar Gelukskinders-stigting plaas.
Haar vertoning in Klerksdorp sal ‘n wye reeks musiek bevat met musiek uit die operawêreld, ligte klassieke musiek, die Afrikaanse kunslied asook meer komtemporêre musiek.
Amira het bekendheid verwerf toe sy opera as 9-jarige by Holland’s Got Talent sing en die kompetisie wen! Sy het geen formele opleiding gehad nie.
Kaartjies vir die vertoning in Potchefstroom is by Quicket te koop en dit kos R200 elk.
Kaartjies vir haar Morester-vertoning is reeds te koop teen R250 elk of R300 elk vir BBP-kaartjies op die gallery wat eet- en drinkgoed insluit. ‘n Ete en wynveiling sal na die vertoning in die saal plaasvind.
Die kaartjiepryse sluit toegang tot dié gebeure in die saal in. Drag is formeel en die vertoning sal om 18:30 begin.
Skakel Margaret van Heerden by 082 523 8289 om kaartjies te koop.
