GEMSBOK-GROBLERSHOOP: Die Noord-Kaapse LUR vir samewerkende regering, menslike nedersettings en tradisionele sake, Bentley Vass, het gewaarsku dat dringende stappe geneem moet word om die ontbinding van !Kheis Plaaslike Munisipaliteit te voorkom.
Die SA Munisipale Werkersunie (Samwu) in die Noord-Kaap het verlede maand gevra dat die munisipaliteit onder administrasie geplaas word aangesien salarisse sedert Desember nie betaal is nie.
Die hoof van kommunikasie by Coghsta, Tebogo Monyo, het gesê die munisipaliteit het ernstige finansiële uitdagings ervaar asook arbeidsgeskille en pensioen- en derdeparty-betalings wat agterstallig was.
“Die opgeblase personeel [aanvulling] het gelei tot die onvermoë van die munisipaliteit om salarisse te betaal. Algehele swak diens het dienslewering negatief beïnvloed. ’n Aksieplan om funksionaliteit en stabiliteit te herstel is ontwikkel en deur die raad ooreengekom,” het Monyo gesê.
Vass, saam met departementele amptenare en verteenwoordigers van die SA Vereniging vir Plaaslike Regering (Salga), het !Kheis Munisipaliteit op 11 Maart besoek in ‘n poging om politieke en administratiewe onstabiliteit aan te spreek.
Hy het die belangrikheid daarvan beklemtoon dat alle raadslede saamwerk om die plaaslike gemeenskappe te dien, ongeag hul politieke lidmaatskap. “Gemeenskappe verdien beter en die munisipaliteit moet kan saamwerk om effektiewe en doeltreffende dienslewering te verseker.
“Die uitdagings wat !Kheis Munisipaliteit bederf, kan dalk lei tot die ontbinding van die raad, wat ‘n stap is waarvoor ons nie graag wil kies nie, maar dit kan nodig wees as ons nie beter saamwerk nie.”
Hy het alle belanghebbendes aangemoedig om te verseker dat die aksieplan met onmiddellike effek geïmplementeer word. “Almal moet aktief betrokke wees by die redding van die haglike situasie waarin die munisipaliteit hom bevind.
“Coghsta, in samewerking met die Provinsiale Tesourie, Salga en !Kheis Plaaslike Munisipaliteit, sal die ooreengekome ingrypings lei en die aksieplan sal gemonitor en ondersteuning verskaf word, om die bereiking van alle gestelde doelwitte te verseker wat na verwagting stabiliteit in die munisipaliteit sal bring. .”
