GEMSBOK-PRIESKA: AfriForum doen ’n dringende beroep op die Siyathemba Plaaslike Munisipaliteit en die betrokke owerhede om onmiddellik in te gryp by die haglike toestand van die vullisterrein op Prieska.
Die terrein voldoen nie aan basiese wetlike en gesondheidsvereistes nie en stel die gemeenskap aan groot risiko’s bloot.
Van die probleme op die vullisterrein is ’n gebrek aan heinings of hekke om toegang tot die terrein te beheer, daar is geen veiligheidswagte of beamptes wat toesig hou oor die perseel nie, asook die onwettige storting van karkasse en buitebande.
In ’n brief wat AfriForum se Prieska-tak aan die munisipale bestuurder gestuur het, eis die organisasie dat ’n heining om die vullisterrein opgerig word om toegang tot die terrein te beperk en te beheer. AfriForum stel ook voor dat veiligheidswagte en toesighouers op die perseel aangestel word om toe te sien dat reëls nagekom word. Dieselfde brief is aan die Groen Skerpioene gestuur.
Postmasburg rioolramp woed steeds voort
GEMSBOK-POSTMASBURG: Ongeag die twee direktiewe wat die nasionale departement van water en sanitasie in 2019 en 2022 aan die Tsantsabane-plaaslike munisipaliteit, om die besoedeling te staak, uitgereik het - blyk dit of die rioolramp op Postmasburg steeds voortwoed.
Dit wil voorkom of die direktiewe op dowe ore geval en blatant geïgnoreer is en die situasie sedertdien verswak het.
Volgens ingeligtes is rou riool steeds in verskeie woonbuurte sigbaar, met ’n ondraaglike stank en ’n duidelike gesondheidsrisiko vir inwoners, veral kinders en bejaardes.
Seksoortreder word swaar gestraf
GEMSBOK-POFADDER: Die Pofadder Streekshof het die suksesvolle skuldigbevinding en vonnisoplegging van ‘n 33-jarige man verseker, vir ernstige seksuele oortredings en verwante misdade, wat teen ‘n minderjarige slagoffer gepleeg is.
Die oortredings het op 1 Julie 2023 plaasgevind toe die beskuldigde die slagoffer oor ‘n tydperk van twee dae ontvoer, aangerand, beroof en herhaaldelik seksueel aangerand het.
Vonnisse soos volg opgelê: Aanranding: 6 maande gevangenisstraf. Roof: 3 jaar gevangenisstraf
Ontvoering: 2 jaar gevangenisstraf. Verkragting (aanklag 1): 25 jaar gevangenisstraf (5 jaar opgeskort). Verkragting (aanklag 2): 25 jaar gevangenisstraf (5 jaar opgeskort) Die vonnisse sal gelyktydig uitgedien word.
AfriForum vra landbou-organisasies om hulp met muggieplaag in Noord-Kaap
GEMSBOK-PRIESKA:AfriForum het landbou-organisasies se kundigheid ingeroep om die toename in muggies in die Noord-Kaap, wat die afgelope paar maande drasties vererger het, te help bestuur.
Dit volg nadat dié burgerregte organi- sasie al talle klagtes van plaaslike gemeenskappe en produsente oor die huidige muggieplaag ontvang het.
Gebiede en dorpe langs die Oranjerivier waaronder Upington, Keimoes, Kakamas, Prieska en Groblers- hoop, word veral deur die muggies geteister.
AfriForum glo dit is noodsaaklik dat landbou-organisasies en burgerlike organisasies saamwerk om hierdie uitdaging aan te pak.
COGHSTA gee antwoorde oor R500 miljoen skuld, betalingsvertragings
GEMSBOK-UPINGTON: Die feit dat COGHSTA skuld van R500 miljoen aan een implementeringsagent opgehoop het en nou bykomende hulpbronne uit die provinsiale beursie benodig, wek kommer oor die departement se vermoë om sy projekte te beplan, te befonds en te bestuur. Dit voorspel ook nie goed vir die gladde aflewering van die R1 miljard behuisingsprojek nie.
Begrotingsbesnoeiings is ‘n fiskale realiteit, maar nie die enigste oorsaak van uitstaande geld nie en daar word van die Noord-Kaap Provinsiale Tesourie en die Departement van Samewerkende Regering, Menslike Nedersettings en Tradisionele Sake (COGHSTA) verwag om betalings met betrekking tot provinsiale behuisingsprojekte te prioritiseer.
Die LUR vir Samewerkende Regering, Bentley Vass het glo erken het dat COGHSTA R500 miljoen aan die Gap Infrastructure Corporation (GIC) skuld, wat as implementeringsagent vir talle behuisingsprojekte optree en wat nie kontrakteurs kan betaal totdat COGHSTA sy skuld vereffen het nie.
More Articles …
