GEMSBOK-NAMAKWALAND: Die multidissiplinêre Operasie Vala Umgodi-spanne in die Noord-Kaap gaan voort om pogings te intensiveer om kriminele aktiwiteite regoor die provinsie te bestry.
Proaktiewe reaksiespanne in die Namakwa- en Frances Baard-distrikte het altesaam 18 ver-dagtes in hegtenis geneem vir onwettige mynbou en oortredings van immigrasiewette.
Die operasies is uitgevoer in samewerking met privaat sekuriteitsmaatskappye, die Departement van Binnelandse Sake en die Privaat Sekuriteitsbedryf Reguleringsowerheid (PSiRA).
Gedurende die vroeë oggendure van Vrydag 1 Augustus 2025 het die Namakwa-distrikspan intelligensie ontvang rakende onwettige mynbouaktiwiteite by ‘n myn naby die Kleinzee-gebied. Die gebied is takties benader met die hulp van privaat sekuriteitspersoneel, wat gelei het tot die inhegtenisneming van sewe mans tussen 19 en 39 jaar oud.
Lede het ook vermoedelik diamanthoudende gruis en ‘n ligte afleweringsvoertuig gekonfiskeer, wat vermoedelik gebruik is in die pleging van ‘n misdaad.
In ‘n aparte voorval in die Frances Baard-distrik het spanne gereageer op inligting wat deur ‘n mynsekuriteitsmaatskappy verskaf is oor onwettige mynbouaktiwiteite by ‘n privaat beheerde myn naby Kennelworth-kamp in Kimberley.
‘n 41-jarige man is op heterdaad betrap en in hegtenis geneem. Mynbougereedskap is ook op die toneel gekonfiskeer.
Vroeër in die week, op Woensdag 30 Julie 2025, is ‘n gesamentlike operasie met die Departement van Binnelandse Sake, die Immigrasie-eenheid en PSiRA in Kimberley uitgevoer.
Intelligensie het lede na verskeie besighede gelei wat daarvan verdink word dat hulle ongedokumenteerde buitelandse burgers as sekuriteitswagte in diens het.
Die betrokke besighede is deursoek, wat gelei het tot die inhegtenisneming van tien individue tussen 22 en 39 jaar oud vir immigrasieverwante oortredings. Verder is vier persone boetes opgelê vir die nie-nakoming van PSiRA-regulasies.
Al die verdagtes is dienooreenkomstig aangekla en sal binnekort in die hof verskyn. Ondersoeke duur voort.
