GEMSBOK-AGGENEYS: EnergyDRIVE, ’n opvoedkundige inisiatief deur die hernubare-energiebedryf, het sy reis in die Noord-Kaapprovinsie begin en in die klein dorpie Aggeneys aangekom.
Dit is die eerste stop op sy reis oor Suid-Afrika se groen energiekaart.
Vanaf Kaapstad het die 2023 EnergyDRIVE-bus by Hoërskool Aggeneys aangekom, waar opgewonde leerders rondom die ikoniese geel “edu-tainer”-bus saamgedrom het.
Die hart van hierdie program is om betrokke te raak en op te voed, met ‘n sterk fokus om die volgende generasie te inspireer.
Yandi Mac Donald, ‘n graad 9-leerder van Aggeneys Hoërskool, het haar gedagtes gedeel en gesê: “Ek het dit fassinerend gevind om die verskillende metodes van energieproduksie te ontdek en die werking van die hele stelsel te verstaan.
EnergyDrive se span was toegewyd daaraan om die werking van moderne energie te verduidelik, wat beduidende voordele aan studente, wat passievol is oor Fisika en Tegnologie, inhou.”
Hierdie inisiatief word moontlik gemaak deur ‘n vennootskap met onafhanklike kragprodusente soos Aggeneys Solar en Konkoonsies II Solar, wie se ondersteuning die besoek aan hierdie skool, geleë naby Aggeneys Solar, moontlik gemaak het.
Dit is ‘n unieke geleentheid vir studente om die boeiende wêreld van hernubare energie te verken.
EnergyDRIVE beskik oor ‘n houer met innemende interaktiewe modelle wat die begrip van verskeie hernubare tegnologieë verbeter. Hierdie uitstallings bevorder nie net bewustheid van hernubare energiebronne nie, maar spreek ook dringende kommer aan wat verband hou met klimaatsverandering.
Met ‘n sondakstruktuur, biogasverteerder, fotovoltaïese paneelvertoning en ‘n sonkrag-warmwater-eenheid, bied EnergyDRIVE waardevolle insigte in die voordele en toepassings van hernubare energie.
Celiwe Mabaso, senior maatskaplike prestasiebestuurder by BTE Renewables, het haar entoesiasme uitgespreek en gesê: “Die EnergyDRIVE-bus gee ons ‘n prettige en interaktiewe manier om groen tegnologieë aan ons graad 8- tot 10-leerders en gemeenskappe bekend te stel. Ons hoop dat hierdie interaktiewe inisiatief belangstelling by leerders sal aanwakker en hulle sal motiveer om aktief deel te wees van die ruimte vir hernubare energie.”
Die Noord-Kaap Provinsie spog met die grootste aandeel IPP’s in wind, sonkrag en gekonsentreerde sonkrag in die land. Dit maak dit ‘n ideale beginpunt vir vanjaar se program, wat perfek ooreenstem met die streek se verbintenis tot volhoubare energie.
Teen die einde van vanjaar (2017-2023) sal die EnergyDRIVE meer as 7 000 leerders in graad 9 tot 12 landwyd bereik het.
