Klerksdorp Midweek, Potchefsroom - Wat gebeur as ’n veteraanjoernalis nog heeltemal te veel op die hart het om in die perke van ’n publikasie in te pas? Marianne Thamm, die ondersoekende joernalis en adjunkredakteur van Daily Maverick, het verlede jaar die eerste keer opslae gemaak met haar eenvrouvertoning Marianne Thamm: Vuisvoos maar regop, waarvan die Engelse weergawe, Round of Applause - South Africa Still Standing vanjaar met ’n Naledi-toekenning vereer is.
Haar werk is ’n goedige gespot, maar dis ook broodnodige perspektief op die eindelose nuussiklus waarmee mense daagliks toegegooi word. Dit help die gehoor sin maak van alles, en dit bring ook hoop en moed vir die toekoms.
Nou maak sy weer so, met Reguit uit Pretoria - Marianne Thamm: Die nuus vars gepers, wat in Oktober by Momentum Aardklop debuteer.
Gehore kan weer uitsien na unieke perspektiewe en kwinkslae soos net iemand wat al deur Julius Malema se vullis gesnuffel het op soek na bewyse van ’n uitspattige leefstyl kan gee.
Soos iemand wat die Suid-Afrikaanse politieke landskap soos haar eie agterplaas ken, en wat weet hoe om dit op ’n vermaaklike, verteerbare wyse aan te bied sodat gehore minder oorweldig voel, en met nuwe hoop na die toekoms kan kyk.
“Elke dag, wanneer die son saggies sy koppie oor die horison steek, word ons wakker in ’n Suid-Afrika wat somtyds voel soos ’n toneel uit ’n tragikomiese grafiese roman,” sê Marianne.
“Daar boor ’n man in Gauteng wat water soek tot reg binne-in die Gautrein-tonnel. ’n Minister kondig aan ons moet rustig wees, want die land is ‘stabiel en veilig’ - ondanks ’n moontlike staatsgreep, geweld, misdaad en terrorisme. Niks om hier te sien nie... stap maar aan.
“Staan nader aan die rand van die malligheid van die wêreld en kom lag saam.”
Die nuus is elke dag vreemder as fiksie, en Thamm belowe enigiets kan en sal op die verhoog gebeur - maar sy bring darem pitkos vir die pad saam.
Koop jou kaartjies by aardklop.co.za.
