Klerksdorp Midweek, Klerksdorp - Afrikaans is nie net ’n taal wat op ’n dag toevallig uit die niet verskyn het en tot wêreld- en akademiese taal gegroei het nie. Sy is deel van ons wesenswortels, leef in mond én hart. Dit is hoe jy jou kinders troos, hoe jy jou ouers groet, hoe jy saam met jou vriende lag.
En nou, danksy Die Afrikaans 100-bordspel, kan jy opnuut in jou moedertaal speel!
Die Afrikaans 100-bordspel, ’n produk wat deur die Federasie van Afrikaanse Kultuurvereniginge (FAK) en Spoetnik ontwikkel is, is op Woensdag 13 Augustus in die FAK-Liedjietuin by die Voortrekkermonument bekendgestel. Dit vorm deel van die viering van Afrikaans se 100-jarige bestaan as amptelike landstaal en ’n perfekte pasmaat van die FAK se weeklange herdenking van die stigting van die Genootskap van Regte Afrikaners (GRA) op 14 Augustus 1875.
Ná die bekendstelling kon die gaste die speletjie self speel - ’n energieke en gesellige sessie waar deelnemers mekaar moes uitdaag in sewe verskillende speelkategorieë. Die gelag was opreg, die mededinging vrolik, en die liefde vir Afrikaans sigbaar.Hierdie spel is ontwerp vir almal - van jong spelers, tot oumas en oupas wat al jare lank Afrikaans as hul moedertaal omhels. Spelers moet bekende Afrikaanse liedjies sing, gedigte voordra, idiome verduidelik, moeilike woorde spel en hul algemene kennis van die taal toets. Daar is selfs ’n kategorie vir “japsnoete” - makliker vrae vir jong kinders of beginners, of om weer te kan speel as die moeiliker vrae jou snoeker!
“Die gedigte is uitdagend, maar motiveer jou om dieper te delf in Afrikaans en Afrikaanse letterkunde. Ek sal dit beslis aanbeveel vir ’n speletjiesaand saam met vriende,” sê Tyrone Kriek, voorsitter van die FAK-Jeug.
Die speletjie bestaan uit 370 kaartjies en sewe hoofkategorieë: Liedjies, Gedigte, Idiome, Ontsyfer, Spelling, Kies Wys en Japsnoete.
Wilmarie Brits, kommunikasie- en sosialemediabeampte van Sol-Tech, het heerlik kom saamspeel. “Die speletjie was regtig baie lekker! Dit toets behoorlik jou taalkennis, maar is hope pret.”
Nico Steyn van Spoetnik, wat die bordspel vervaardig en versprei, beskryf die bordspel as “heerlik interaktief, met spanne of spelers wat mekaar laat skaterlag met hul sang of fluite, welluidende, droomsagte en klipharde gedigte wat die gemoed laat smeul, skreeusnaakse idiome en sêgoed, beskrywing van lawwe, koddige, aardige en eg Suid-Afrikaanse woorde, die besonderse uitdaging óf nagmerrie om moeilike woorde reg te spel en ook sommer om ’n klomp dinge/goeters/ietse en feite oor Afrikaans, Afrikaanswees of Afrikaanse mense te leer.”
Volgens Barry Müller, nasionale hoof: gemeenskap, geskiedenis en ad hoc-projekte van die FAK, is hierdie spel ’n antwoord op ’n behoefte wat lank reeds bestaan: “Ons hoor gereeld mense sê hulle wil meer Afrikaanse inhoud hê wat relevant, speels en opvoedkundig is - iets wat jy saam met jou kinders, kleinkinders of selfs in die klaskamer kan gebruik. Hierdie speletjie doen presies dit,” sê hy.
“Afrikaans 100 vier nie net die geskiedenis van die taal nie, maar hou dit ook lewendig in die hede - op maniere wat sin maak vir vandag se gesinne en gemeenskappe.”
Zieg van Huyssteen, FAK-bedryfshoof, moedig almal aan om hierdie speletjie aan te koop. “Afrikaans is ’n werkwoord wat prakties gestalte kry deur hierdie nuwe opwindende bordspeletjie. Beslis ’n moet vir elke huis.”
Die Afrikaans 100-bordspel is beskikbaar op die KultuurKafee se aanlynwinkel en beloof om ’n gunsteling te word vir ieder en elk wat Afrikaans in hart en siel is.
Koop dit gerus hier: https://kultuurkafee.com/shop/speletjies/die-afrikaans-100-bordspel/#
