Klerksdorp Midweek, Potchefstroom - Die Noordwes-Universiteitsraad het die oud-Klerksdorper Jannie Oosthuizen vereer met ‘n eredoktorsgraad.
Die graad is op Vrydag 2 Augustus aan hom oorhandig. Oosthuizen is vereer vir uitstaande akademiese meriete in Aptekerswese en sy leierskap van Merck, ‘n Amerikaanse maatskappy betrokke by die vervaardiging van medisyne en entstowwe wat wêreldwyd sake doen. Die NWU wou hom ook vereer vir die uitsonderlike bydrae tot die bevordering van die NWU se visie en missie met sy roemryke internasionale loopbaan.
Hy het in 1985 aan KHS gematrikuleer en is tans president van Merck. “Dit is ‘n ongelooflike eer wat die NWU en sy Raad aan my betoon het. Die werk wat ek die afgelope drie dekades gedoen het en die geleentheid wat ek gehad het om ‘n verskil in die lewens van gemeenskappe en pasiënte regoor die wêreld te maak, is werklik in hierdie erkenning saamgevat. Ek is die universiteit ewig dankbaar.”
Oosthuizen is bekend vir sy insig in en kennis van die farmaseutiese bedryf en word dikwels in die media aangehaal. Hy is ook genooi om as kundige spreker op panele te dien. Sy kundigheid omspan die farmaseutiese produkpyplyn en teikens, gesondheidsekonomie, waardebewyse en ondersteuning, en innoverende beloningstelsels. Hy is ook sterk daartoe verbind om die omgewing te bewaar.
Sy loopbaan in die bedryf omspan drie dekades van uitnemendheid by verskeie farmaseutiese maatskappye. Hy was sedert 2022 die president van MSD Human Health in die Verenigde State, die grootste wêreldwye besigheid van MSD, ’n toonaangewende navorsingsintensiewe biofarmaseutiese maatskappy. Hy verteenwoordig ook wêreldwye menslike gesondheid op die MSD se uitvoerende span as uitvoerende beampte van die maatskappy.
Oosthuizen het goeie raad vir voornemende farmaseutiese studente. “Wanneer jy by die NWU studeer, gaan jy beslis opleiding kry, maar jy gaan ook perspektief kry. Om ʼn student te wees wat die universiteit met ʼn kwalifikasie verlaat, is een ding, maar om ʼn landsburger te wees wat nie net in hierdie land nie, maar ook in die wêreld ʼn impak maak, is iets heeltemal anders. Maar ek glo hierdie universiteit sal julle toerus vir daardie reis. Dit het my beslis toegerus. Dit is wat ons nodig het, mense wat in die wêreld uitgaan om ‘n verskil te maak en by te dra tot die samelewing en die missie te vervul wat jy nog gedurende jou jare by die universiteit gaan skep.”
Hy en sy gesin woon in New York.
