Klerksdorp Midweek, Klerksdorp - Riaan Benade stel op Saterdag 8 Junie sy nuwe CD “Die Lot’’ in die Escapadesteater by Rio Casino bekend. Hy het nog net hoër hoogtes bereik na sy debuutalbum in Augustus 2020 die lig gesien het. Spontaan, die titelsnit, is steeds die mees gestroomde Afrikaanse liedjie op Spotify. There Was Jesus, sy wegholduet met Demi Lee Moore, is kort daarna vrygestel. Hierdie liedjie is tot op hede meer as 10 miljoen keer op YouTube gekyk.
Sommiges sal egter verbaas wees om te sien watter ander liedjies deel is van dié Nylstroom-sanger se oeuvre. Dit sluit Bok van Blerk se Land en Strand (die titelsnit van Bok se gelyknamige VIA-televisieprogram) en Ruhan du Toit se Monumentaal in wat hy saam met Gerhard Steyn geskryf het.
Riaan het in 2022 die AITSA-toekenning vir die suksesvolste Afrikaanse snit deur ’n manlike kunstenaar vir Rowwe Bliksem gewen, sy liedjie saam met Jay wat hulle twee ook saam met Marno van der Merwe geskryf het.
In 2023 word hy die eerste Suid-Afrikaanse kunstenaar wat deur Spotify genader is om ’n eksklusiewe Spotify-enkelsnit vry te stel.
Benadé en die Nashville countryster Ian Munsick se weergawe van Springsteen se I’m On Fire is einde 2023 vrygestel.
Die kaartjies vir die konsert in Klerksdorp kos R250 elk en is by C-Thru Glass and Aluminium, Williamsstraat 44 in Wilkoppies te koop. Gereserveerde plekke word verkoop. Meer inligting van Artistique Productions by 083 716 5495.
