GEMSBOK-UPINGTON: ’n 46-Jarige man, wat daarvan beskuldig word dat hy hom as ’n prokureur voorgedoen het, het homself vandeesweek in die hof bevind - nadat hy deur die Rosedale-speureenheid gearresteer is.
Freddie van Wyk staan tereg op ernstige aanklagte, waaronder sewe aanklagte van geldwassery en een aanklag van kubermisdaad.
Omphile Masegela, Noord-Kaapse polisiewoordvoerder, het onthul dat Van Wyk hom na bewering as ‘n prokureur voorgedoen het en sy slagoffers mislei het deur te beweer dat hy regsverteenwoordiging in arbitrasie-aangeleenthede teen ‘n fooi verskaf.
Om sy beweerde bedrieglike aktiwiteite te bevorder, het hy homself valslik voorgestel as ‘n lid van die National Union of Metalworkers of South Africa (Numsa), en beweer dat hy gemagtig is om vakbondlede in arbitrasie- en Kommissie vir Versoening, Bemiddeling en Arbitrasie (KVBA) aangeleenthede te verteenwoordig.
Sersant Masegela het gesê daar is met ondersoek vasgestel dat Van Wyk nóg ‘n gelisensieerde regspersoon nóg ‘n geregistreerde Numsa-lid is.
Hy het na bewering tussen De Aar en Upington geopereer en daar was kommer oor die potensiaal vir bykomende slagoffers wat moontlik deur sy optrede geraak is. Van Wyk het op 16 Oktober in die Upington-landdroshof verskyn en sal na verwagting weer op 23 Oktober vir ‘n formele borgtogverhoor verskyn.
Die polisie het ‘n beroep op enigiemand met inligting oor hierdie saak gedoen om na vore te kom, met die klem dat die ondersoek sal voortgaan aangesien hulle poog om enige verdere slagoffers van hierdie beweerde bedrieglike skema op te spoor. Diegene met wenke word aangemoedig om sers. Tshepo Morwaagae by 082 260 0443 of 054 337 0126 te kontak.
