GEMSBOK-UPINGTON: In die Noord-Kaap was vyf amptenare betrokke by sake van finansiële wangedrag - waar R100 741,54 verlore gegaan het en slegs R1 999,98 teruggekry is
Noxolo Kiviet, minister van staatsdiens en administrasie, het onthul dat R1,5 miljard verloor is - weens finansiële wangedrag wat deur staatsamptenare in nasionale en provinsiale departemente gepleeg is.
In reaksie op navrae oor die dissiplinêre sake waarna verwys word in die verslag deur die Staatsdienskommissie wat onlangs in die Parlement ter tafel gelê is, het Kiviet gesê die Staatsdienskommissie het bevind dat die aantal finansiële wangedragsake soos aangemeld deur nasionale en provinsiale departemente 523 was tydens die 2021-22 finansiële jaar.
“Die nasionale departemente het die meerderheid sake (268) aangemeld, met provinsiale departemente wat 255 sake gedurende die oorsigtydperk aangemeld het,” het sy gesê.
Sy het gesê die totaal wat weens finansiële wangedrag verloor is, was R1 565 947 264,46.
“Die hoogste bedrag wat weens finansiële wangedrag verloor is, R1 327 883 817,48, was in die nasionale departemente.
Die provinsiale departemente het altesaam R238 063 446,98 aangemeld as geld wat verlore gegaan het weens finansiële wangedrag gedurende die tydperk onder oorsig.”
Kiviet het gesê die bedrag wat verhaal is, was slegs R6 123 708,77. “Die nasionale departemente het R555 636,18 (0,05%) van die totale bedrae wat hulle aangemeld het teruggekry,” het sy gesê. “Die provinsiale departemente het R5 568 072,59 (2,34%) van die genoemde bedrae teruggekry.”
Kiviet se antwoorde het getoon dat 265 amptenare betrek is by sake van finansiële wangedrag by nasionale departemente waar die verlore bedrag R1 056 865 287,87 was.
Die uiteensetting van amptenare betrokke by finansiële wangedrag, bedrae wat per provinsie verloor en verhaal is, sluit in:
Vrystaat: 23 amptenare betrokke by finansiële wangedrag wat gelei het tot verliese van R10 362 090,91, met R 8 093,31 verhaal;
Gauteng: 46 amptenare betrokke by sake van finansiële wangedrag wat tot R67 003 121,02 verliese gelei het en R5 468 814,61 is teruggevind;
Noord-Kaap: vyf amptenare betrokke by sake van finansiële wangedrag waar R100 741,54 verloor is en R1 999,98 teruggevind is;
Noordwes: sewe amptenare het R110 531 932,10 verloor weens finansiële wangedrag en R19 964 is teruggekry; en Wes-Kaap: 33 amptenare betrokke by finansiële wangedrag, met R264 933,18 verlore en slegs R33 789,50 teruggevorder.
