GEMSBOK-RIEMVASMAAK: Willem Damarah, ‘n kenner van inheemse tale, in besonders die Nama taal, is onlangs oorlede.
Willem of Toortjie, soos hy bekend gestaan het, was ‘n tradisionalis en ‘n taalkundige.
Willem Damarah is gebore op 16 Julie 1964 te Riemvasmaak. Hy was die 7de oudste kind van wyle Gert en Leentjie Damara.
Sy broer, Gerhardus, skryf die volgende van hom:
“ Willem sal onthou word vir die baanbrekerswerk wat hy vir die inheemse tale in die besonders Khoi en San tale, verrig het. Sy kennis van die Nama taal was noemenswaardig. Sy nalatenskap en mylpale in die ontwikkeling en bevordering van die Khoi en San tale, sluit die volgende in, om maar net ‘n paar te noem:
Hy was n Onderwyser aan die Laerskool Riemvasmaak vir jare voordat hy diens by die Streekskantoor aanvaar het.
Hy was ‘n vak adviseur in die ZF Mgcawu Streek in die Onderwys Departement waar hy die Nama taal help vestig het en verseker het dat kwaliteit onderrig plaasvind.
Toortjie was deel van die Nasionale Khoi en San Taal Raad van PANSALB
Hy help skryf die eerste Uitgawe van die Nama , N/u , Afrikaans en Engelse Woordeboek.
Hy help skryf die eerste uitgawe van die Spelreels en Outografie van die Nama Taal.
Hy was ook deel van die Northern Cape Writers Festival wat op inheemse tale en Mondeling geskiedenis gefokus het. Hy het jaarliks “the round tables” Nama verteenwoordig in Kimberly by die Writers Festival
Hy het die praat van Nama aangemoedig omdat hy geglo het ‘n taal wat gepraat word kan nie uitsterf nie.
Hy het ook verskeie kere as vertaler opgetree vir die San mense.
Willem was die voorsitter van the South African Nama Development Association, ‘n nie regerings organisasie, wat in die Noord Kaap gevestig is. Hy het as voorsitter verskeie portefeuljes behartig onder andere die fisiese onderrig van Nama in gemeenskappe soos Craddock, Tsitiskamma, Richtersveld, Bloemfontein om maar net ‘n paar te noem.
Die laaste bydrae wat hy gemaak het, was die skryf en assessering van die konsep sillabus. Hierdie projek was ten doel om te verseker dat Nama as amptelike moedertaal in skole aangebied word in Suid Afrika.
Willem Damarah sal onthou word deur sy familie, vriende en breë gemeenskap as:
‘n Familie en gesinsman, iemand wie altyd ‘n oor gehad het om eers goed te luister voordat hy baie wyse raad sal gee.
Hy het altyd dieper gekyk as wat die oppervlak wys. Iemand wie baie sagmoedig en betroubaar was. Iemand met die gawe om te onderskei tussen reg en verkeerd , goed en kwaad.
‘n Gedissiplineerde persoon wat baie hardwerkend is. Iemand met n goeie sin vir humor. Hy kon n mens met sy manier van praat op jou gemak stel en kon ‘n gehoor aan sy mond laat hang met al sy sê goed. Hy het empatie gehad en het hom altyd vereenselwig met hulle wat swaarkry. Vir hom was die nood van andere geen geringe saak nie.
Hy was ‘n vredeliewende mens, nederig, verstandig en baie wys. Hy was goed belese en sy kennis het oor ‘n wye spektrum gestrek. Iemand wie baie tradisioneel was en n besonderse liefde en gawe vir die Nama taal gehad het.
Op 12 Mei 2024 is hierdie lewensboek van Willem Damarah gesluit. Ons is hartseer maar gun hom die rus. Hy sal bly voortleef in ons soete herinneringe.”
