GEMSBOK-UPINGTON: ‘n Gemeenskap in die Khoi-San-vallei van Upington het vandeesweek baat gevind by agro-ekologieopleiding deur die humanitêre en ontwikkelingsorganisasie, ForAfrika, aangesien hulle hul eie gemeenskaplike tuin gevestig het.
Die projek, wat deur die Ackerman-stigting gefinansier word, het ten doel om lede van die gemeenskap te voorsien van die gereedskap en vaardighede wat hulle nodig het om volhoubaar vir hulself kos te voorsien.
ForAfrika se voedselsekerheid- en lewensbestaanspesialis Tarirai Mpofu was byderhand om belangstellende lede van die gemeenskap te leer hoe om ’n “eko-tuin” te vestig wat voedsame groente sal produseer. 'n Eko-tuin gebruik geen kunsmatige bemesting of plaagdoders nie," sê Mpofu, wat verskeie gemeenskappe regoor die land gehelp het om hul eie gewasse te plant en te oes.
“Ons gebruik natuurlike kompos en mis asook ander metodes soos tussengewas en wisselbou om die ekosisteem te ondersteun. Ons bou die grond natuurlik op.” Verhoogde beddings in houtrame is op 'n 20mx20m plot in die Koi-San-vallei opgerig en met groentesaad en saailinge geplant. Die bokse help met waterbesparing en gemak van onderhoud.
Die verskeidenheid groente is gekies om die beste by die omgewing en ook die voedingsbehoeftes van die mense te pas. "Ons gaan spinasie, beet, uie, eiervrugte en tamaties plant, asook 'n paar kruie soos basiliekruid en tiemie," sê Mpofu. "Ons wil ook wortels doen, want hulle het nie veel nodig wat grond betref nie. Die grondgehalte hier is nie so goed nie.” Benewens die opleiding, bokse en saailinge, het die projek die gemeenskap van skadunet, twee 5 000l-watertenks, tuinslange en ander tuinmaak-implemente voorsien.
Die inisiatief is positief ontvang, met Mpofu wat gesê het dat die meeste van die 20 deelnemers op die tweede dag teruggekeer het: “Dit is 'n mate van belangstelling. Ons dra vaardighede oor; selfs die manier waarop ons grawe, is iets nuuts.”
Deelnemer Ru-Ann Matthews, uitgedos met 'n strooisonhoed en heldergroen tuinmaakhandskoene, is verheug dat sy kos vir haar kinders en dié van die minderbevoorregtes sal kan produseer. “Die rede hoekom ek dit doen, is dat ek môre of die volgende dag vir my baba van sewe maande van die vrugte en groente sal kan gee om te eet. Ons sal minderbevoorregte kinders ’n bietjie sop en ’n stukkie brood kan gee.”
Die plaaslike kindersokkerafrigter, Antonie Slinger, sê dat die opleiding wat hy ontvang het, “ewigdurend” is en aan die jonger geslagte oorgedra kan word. “Ek wil hulle [die jong spelers] eendag hierheen bring en vir hulle wys jy kan baie dinge doen as jy net jou hart daarin sit.
Ons is dankbaar dat ForAfrika ons gekies het sodat ons ons eie kos kan eet en nie koop nie. Ons het nie werk nie, ons eet nie elke dag nie, want ons het nie geld nie. Dit sal ons help om voedsame kos te eet. Ons het dit regtig nodig.”
Die tuiniers van Khoi-San-vallei sal oor 'n paar maande van hul groente kan oes. “Ons is so dankbaar teenoor die Ackerman-stigting wat hierdie gemeenskap van die Khoi-San-Vallei bygestaan het, ook al die ander vennote wat so mildelik hul hande oopgemaak het soos mnr Stanley Peterson, hoof van die Khoi-San gemeenskap, wat die grond beskikbaa gestel het, asook plaaslike boere wat kunsmis geskenk het en CRC Cares wat help om die hele projek n sukses te maak,” sê Adel Terblanche, ForAfrika gemeenskapsontwikkelingsbeampte.
"Dit was so 'n vreugde om te sien hoe die mense hier werk, altyd glimlaggend en bly om te leer, al is dit 36 grade en geen skaduwee nie!"
ForAfrika is die grootste humanitêre en ontwikkelingsorganisasie in Afrika wat werk vir 'n Afrika wat floreer. In noue vennootskap met ons gemeenskappe bring ons hulpbronne en implementeer programme wat plaaslik gelei word om die struikelblokke wat mense in die gesig staar aan te spreek, wat lei tot billike groei en transformasie. Vir verdere inligting kontak: forafrika.org
