GEMSBOK-UPINGTON: Polisie-operasies hier het verlede week goeie resultate in die ZFM-distrik opgelewer. ‘n Misdaadintelligensie-gedrewe operasie deur die Upington Grenspolisie, bygestaan deur die K9-eenheid, het gelei tot die inhegtenisneming van vier verdagtes vir dwelmhandel.
Die polisie het inligting ontvang en opgevolg oor dwelms wat by een van die persele in Paballelo afgelewer sou word.
Nadat die inligting geoperasionaliseer is, het die lede die perseel deursoek en dagga ter waarde van R33 350 ontdek en drie verdagtes van onderskeidelik 22, 28 en 38 jaar oud in hegtenis geneem.
Verder is ‘n 31-jarige man in besit van mandrax-tablette en metamfetamien met ‘n geraamde waarde van R123 000 in hegtenis geneem.
Daarbenewens het die polisie ook selfone en ‘n skaal wat vermoedelik in die pleeg van die misdaad gebruik is, gekonfiskeer.
In ‘n onverwante voorval het die polisie in Keimoes ‘n onwettige drankwinkel gesluit en drank ter waarde van R15 000 gekonfiskeer. ‘n Bejaarde man is aangekla vir die oortreding van die Noord-Kaapse Drankwet.
Die meedoënlose optrede deur die lede om dwelms en ander verwante misdade uit te roei, is geprys deur die distrikskommissaris van ZFM, generaal-majoor Monica Sebili, wat die gemeenskap aangespoor het om voort te gaan met die aanmelding van onwettige dwelmhandel.
Die polisie sal voortgaan om hul greep te verskerp en onverpoosd voort te gaan om die ruimte vir kriminele aktiwiteite in die ZFM-distrik te verminder.
