GEMSBOK-ROSEDALE: Die vasberadenheid en uitstekende ondersoekwerk, deur sers. Tshepo Morwaagae van Rosedale-speurders, om teen bedrieglike aktiwiteite te veg, is deur die bestuur van die SAPD in die Noord-Kaap geloof - nadat ‘n 33-jarige man vir twee afsonderlike bedrogsake opgesluit is.
Granville Saunderson (33) is aanvanklik in Augustus 2023 in die Upington-streekhof skuldig bevind aan bedrog, waar daar beweer is dat hy die slagoffer in Desember 2022 met ‘n vals huisverkooptransaksie met R178 000 bedrieg het.
Hy is tot ses jaar gevangenisstraf gevonnis, opgeskort op voorwaarde dat hy die slagoffer vergoed en is vrygelaat op ‘n terugbetalingsreëling, wat hy nie nagekom het nie.
’n Lasbrief vir inhegtenisneming is uitgereik en sy vonnis van ses jaar gevangenisstraf het van krag geword - ná sy herarrestasie in Mei 2024.
Intussen, met die inhegtenisneming van die beskuldigde, is nog ‘n saak teen hom ondersoek - waartydens hy in Oktober 2023 ‘n huis te koop geadverteer het en die niksvermoedende slagoffer het met hom begin kommunikeer.
Na ‘n ooreenkoms van R140 000 koopprys, is die slagoffer ‘n konsepverkoopooreenkoms toegestaan - terwyl hy die huis bewoon het.
‘n Bedrag van R70 000 is in die rekening van die beskuldigde betaal. Die slagoffer het later verneem dat die huis nie aan die beskuldigde behoort nie en daarom was die verkooptransaksie onwettig.
Die beskuldigde is onlangs in die Upington-streekhof skuldig bevind aan kuberbedrog en geldwassery en is gevonnis tot onderskeidelik 8 jaar en 5 jaar gevangenisstraf wat saam met die vorige aanklag uitgedien sal word.
