GEMSBOK-KAMIESKROON: ’n 41-jarige munisipale bestuurder het vandeesweek vlugtig in die Garies-landdroshof verskyn op aanklagte kragtens die Wet op Pen-sioenfondse 24 van 1956.
Volgens ao Nomthandazo Mnisi, woordvoerder van die Valke in die Noord-Kaap, is Beukes op 7 November deur die Valke se Ernstige Kommersiële Misdaad-ondersoekspan by sy werkplek gearresteer.
As munisipale bestuurder van Kamiesberg Plaaslike Munisipaliteit in Garies het Rufus Beukes na bewering versuim om tussen September 2019 en April 2024 bydraes wat van werknemers se salarisse afgetrek is, asook werkgewerbydraes, aan die Gekonsolideerde Aftreefonds (CRF) te betaal en/of laat betalings gemaak het. Die uitstaande rente op hierdie laat betalings het R2 miljoen oorskry.
Beukes is op borgtog van R10 000 vrygelaat, en die saak is tot 5 Desember vir regsverteenwoordiging uitgestel.
