GEMSBOK-DANIëLSKUIL: Munisipaliteit het ‘n agt persent prestasiebonus goedgekeur vir ‘n voormalige amptenaar, Alfred Tieties, wat destyds as die waarnemende munisipale bestuurder gedien het.
Die Raad het die bonus, wat teruggedateer is na die 2021/22-boekjaar, tydens ‘n raadsvergadering op 7 November goedgekeur.
Tieties het op dieselfde dag uit sy rol as waarnemende munisipale bestuurder van die ZF Mgcawu-distriksmunisipaliteit bedank.
Die LUR vir Samewerkende Regering, Menslike Nedersettings en Tradisionele Sake het die ZF Mgcawu-raad by verskeie geleenthede in kennis gestel dat sy aanstelling onwettig was aangesien hy nie die vereiste ondervinding en kwalifikasies het om die pos te vul nie.
Willie Blundin, munisipale bestuurder van Kgatelopele, het verduidelik dat die raad in goeder trou en in ooreenstemming met sy beleid opgetree het.
“Tieties is destyds voor my raad ingehuldig as waarnemende munisipale bestuurder aangestel en is na ZF Mgcawu Munisipaliteit gesekondeer,” het Blundin gesê.
“Die Staatsdiens Prestasiebestuur-ontwikkelingstelsel (PMDS) se beleide en wetgewing maak dit vir die waarnemende persoon moontlik om ‘n prestasie-ooreenkoms te onderteken. Daarom is die persoon daarop geregtig om geassesseer of beoordeel te word volgens ons beleid. In gevalle van die munisipale bestuurder of waarnemende munisipale bestuurder, moet die burgemeester die werknemer op ‘n kwartaallikse basis takseer en punte aanteken.”
Hy het verduidelik dat die PMDS-komitee, bestaande uit die burgemeester, ouditkomiteelid, wykskomiteelid, munisipale bestuurder van ‘n ander plaaslike owerheid en ‘n raadslid in finansies, die saak oorweeg het en ingestem het tot die telling wat aan die waarnemende munisipale bestuurder toegeken is op grond van sy prestasie.
“Die komitee het geen rede om die kwalifikasies van die posbekleër te oorweeg nie. Dit sou onregverdig gewees het om dit aan die kwalifikasies te koppel, maar eerder die prestasie van die werknemer,” het Blundin bygevoeg.
