GEMSBOK-UPINGTON: Wat voel na dekades van stank en klagtes kon Upingtonners verlede week uieindelik na verligting snak, toe die Dawid Kruiper plaaslike munisipaliteit, Afriforum en plaaslike sakelui, hande gevat het om die probleem vir eens en hopelik vir altyd, aan te spreek.
Na vele korrespondensie, saamesprekinge, terrrein besoeke en soms argumente, tussen Afri-forum, die media, inwoners, rolspelers en die siviele afdeling van die plaaslike munisipaliteit, kon ‘n spesiale span saamstaan om hulle kennis en vaardighede in te span - om die jarelange stinkende ‘vleiland’ tussen die Kalahari Mall en Hoërskool Duineveld te begin dreineer en hopelik so op die kern van die stinkende probleem af te kom.
Na bykans ‘n hele dag se grawe met sy grondverskuiwingstoerus-ting, kon Wouter van Zyl (Van Zyls Blasting) twee moontlike probleempunte uit die swart modderige moeras ontaard.

GEMSBOK-UPINGTON: Rolspelers beywer hulle vir die dringende herstrukturering van Dawid Kruiper se riooleenheid, aangesien Upington oorstroom met afval en die munisipaliteit die oorlog teen riool verloor.
Oor die laaste paar jaar het rioolstortings teen ‘n vinnige tempo toegeneem, wat herhalende en langdurige kenmerke van die eens ongerepte dorp geword het.
Eers moes llr Erica Strauss die munisipaliteit lastig val om aandag te gee aan die herhalende storting agter CTM, wat in die kanaal en die Oranjerivier beland het.
Die drein was tydelik ontstop maar dit is net ‘n kwessie van tyd voordat die verstopping terugkeer.
Flip Van Der Steen plaas intussen druk op die munisipaliteit om die rioolstorting agter Protea Hotel, wat ook in ‘n kanaal mors, reg te maak.
Die lekkasie agter Checkers is ook vir maande nog nie opgepas nie, terwyl die riool wat in die veld langs die winkelsentrum opgedam het, voortduur.
Dit is van die meer hoëprofiel-rioollekkasies wat die dorp teister, die kanaal- en riviergehalte bedreig, die gesondheid van inwoners in gevaar stel, besighede verwoes en die lewe in Upington al hoe meer ondraaglik maak.

GEMSBOK-GROBLERSHOOP: Slaggate, gereelde krag- en wateronderbrekings en vullis wat die wêreld vol lê. 
Dít is sommige van die probleme wat die inwoners van Groblershoop in die gesig staar. 
Dit is egter nie hierdie Noord-Kaapse dorpie se grootste hoofpyn nie. 
Rou riool kan gereeld in velde en selfs watermassas in en om die dorp gewaar word. Dít is omdat die !Kheis Plaaslike Munisipaliteit riool in die gebied stort.
Volgens Werner Strauss, AfriForum se distrikskoördineerder vir die Noord-Kaap, lê daar rou riool in poele in en om die dorp. 
Munisipale werkers het selfs aan AfriForum erken dat hulle aangesê is om só van hierdie riool ontslae te raak. 
“Selfs die infrastruktuur wat riool na die rioolwerke pomp is selde in ’n werkende toestand omdat dit gebuk gaan onder vandale. Dit is dan wat die riool opdam en die omgewing besoedel,” sê Strauss.
Benewens die gereelde besoedeling wat plaasvind is die swak instandhouding van paaie en vullisterreine in Groblershoop ook ’n probleem. 

GEMSBOK-UPINGTON: Die meedoënlose vasberadenheid deur lede van Upington Grenspolisie het daartoe gelei dat   meer dwelms ontdek is, nadat hulle inligting ontvang het oor moontlike versteekte dwelms by ‘n perseel wat hulle die vorige dag tydens ‘n operasie deursoek het.
Op Sondag, 25 Augustus 2024, het die lede weer die toneel besoek nadat hulle magtiging verkry het en die perseel deursoek.
Hulle het ontdek Mandrax-tablette met ‘n geraamde straatwaarde van R20 600, kokaïen ter waarde van R223 720  en metamfetamien ter waarde van ongeveer R132 000 - wat in ‘n versteekte kompartement in die huis opgeberg is.
Die verdagte was reeds in aanhouding op die vorige aanklag, en ‘n ondersoek is geregistreer vir verdere ondersoek.
Die polisie sal gefokus en volhardend bly om dwelms uit die strate te verwyder en sal geen steen onaangeroer laat nie.